JET AI NAWKU HPUNG MASHA

Nawku hpung hta, mying jahpan sha bang da ai rai yang, nawku hpung masha ajet tai sai kun? Shing nrai, nawku hpung kata na, Sacramentu ni hpe, hkam la jang she, nawku hpung masha ajet teng teng tai lu na kun? myit yu na lam ni nga nga malu ai.

Jawng mying bang da ai hte sha, jawngma tai sai ngu nna, ntsun lu nga ai. Kaja wa jawng lung, jawng sa yang she, jawngma tai wa ai rai nga ai. Dai hte maren sha, anhte Catholic hpung mashan ni mung, nawku hpung jahpan hta mying rawng nga sai raitim, nawku jawng gaw nsa, tinang a ting kyeng bungli ni hta sha noi rawng taw nga ai rai yang, Catholic hpung masha ajet ngu nna tsun na matu yak na rai nga ai. Nawku jawng sa, kyu hpyi hpawng sa ai hte, nawku hpung a magam lam ni hta, shang lawm gun hpai yang she, nawku hpung masha ajet tai wa na rai nga ai.

Bai, jawng lung jawng sa galaw ai hte sha mung, san poi awng wa ai baw nrai nga ai. Jawng laika galaw ai hte laika hti shakut yang she san poi awng nna, hpaji chye ai jawngma tai wa lu mai nga ai.

Dai hte maren sha, nawku hpung kata na Sacramentu ni hpe, hkam la lu sai majaw sum sing mungdan shang lu sai ngu nna nmai tsun nga ai. Nawku hpung kata na, hkan sa ra ai tara ni hpe htep lahti hkan sa ai, Karai Kasang a asak hkrung ai mungga hte maren sak hkrung nga sa ai hte, masha ni a matu akyu pru manu dan ai hku nna nga sa yang she, sum sing mungdan du ai baw rai nga ai.

Dai ni anhte a nawku hpung masha nkau mi hpe bai yu dat ai shaloi, mying jahpan sha bang da nna, nawku jawng nsa ai hpung masha ni, nawku hpung a shamu shamawt ai lam hta, nshang lawm ai hpung masha ni, Karai Kasang a mungga hte maren, mai kaja ai asak aprat hpe nhkawm sa ai hpung masha ni grai nga nga ai.

Ndai zawn re ai hpung masha ni gaw, mying gun da ai hpung masha ni, mying hkam la ai ni sha rai nga ai.

Nawku hpung masha ajet tai na matu, kyu hpyi nawku jawng sa ai hta shakut ra ai. Nawku hpung magam lam ni hta shang lawm ra ai. Karai Kasang a mungga hte maren asak hkrung nga sa ra ai. Dai rai yang rai she, jet ai nawku hpung masha tai wa nna, sumsing mungdan de mung shang lu na rai nga ga ai.