Malaysia mungdan, Malacca kaw na deng (3) ram tsan ai Malim mare na Nawku jawng gaw lai wa sai tsaban ga ang hkup ram kaw na gaw gap da ai rai nga ai.
Malacca mare kaw shanu nga ai Mrs. Joana Sta. Maria mying ai hpaw mi a kasha langai mi gaw Malim kaw nga ai U Dang hpe sa tam la na lam masum ya tup yup mang mu lai wa sai. N nan daw gaw n dai yup mang hpe gadai mung kam ai lam, hkap la ai lam n nga ma ai rai tim jahkring hkring yup mang bai mu mu re ai majaw masha n kau mi gaw kaja ai namik kumla rai na lam myit wa ma ai. Dai majaw Kabu kaw shanu nga ai Portugal masha ni gaw Malim kaw nga ai U Dang hpe tam na matu zuphpawng galaw hpang wa ma ai.
A ten ladaw ni na mat wa ai rai tim U Dang hpe tam n mu, myit daw myit htum wa ma yang, dai makau kaw nga ai Malay myu sha langai mi gaw dai bum n tsa kaw Hkristan ni a U Dang kaja wa nga ai lam hpaw tsun wa ai. Dai majaw hpung masha ni gaw matut tam mat wa yang wup hte gaw da ai shara langai mi a n tsa kaw U Dang langai mi hpe mu tam la ma ai. U Dang dai hpe gadai mung hkra ai lam, sit kau ai lam n galaw gwi ma ai. Karai Kasang ra sharawng ai shara rai na re ngu hkam la let, dai shara kaw na nam maling ni hpe hkyen shatsai nna Malacca Alor Gajah lam kaba de du hkra hkyen baw mat wa ma ai.
Dai shiga gaw Malacca mare ting chyam bra mat wa ai majaw mare masha ni law law wa dai U Dang hpe sa du nawku hkungga jaw ma ai. Kabu mare kaw shanu nga ai Portugal masha ni gaw grau kaba ai U Dang hpe la sa wa nna shanhte mu tam la ai U Dang kaji a n tsa Nawku tawn galaw nna dai n tsa kaw htingnu gap nna tawn da ma ai.
Sadu Nawku ai hpung masha ni kawn alu ja gumhpraw ni bang wa ai majaw dai shara kaw Nawku jawng kaji langai mi gap da lu ma ai. Dai Nawku jawng hpe Sta. Cruz ngu shamying da lai wa masai.
N dai mu tam la ai U Dang kaji gaw Dutch myu sha ni naw up hkang ai ten makam masham n hkap la, zingri zingrat ai majaw hpung masha ni gaw n dai U Dang hpe lang nna nam lai kata hkan nawku lai wa ai kawn ngam kau da ai re lam chye lu ai. N dai Nawku jawng kaw namik kum la ni mung madun lai wa sai lam hkum nan mu hkrum lai wa sai Malim mare na asak (71) ning re Mr. A.G Lopez gaw 1993 ning hta hpaw tsun sak se hkam lai wa sai.
Shi sak se hkam lai wa ai hta n dai Nawku jawng hta U Dang mung la ai ladu hkrum poi galaw na hkyen nga yang bat kru ya shana yup tung (11:30) ram hta nawku jawn kaw amu galaw ai Kia Onn gaw shi sara Joanes Barnabas hpe shaga nna htoi tu gabrim tsawm ai wan shanan langai gaw Our Lady Of Guadalupe nawku jawng kawn Sta. Cruz nawku jawng maga de sit sa wa ai hpe madun ai. Laklai htoi tsawm ai wan shanan hpe du sa ai hpung masha ni yawng pra pra nan mu lu lai wa ma ai. Nawku jawng de ni wa ai shaloi Nu Maria hpe lamu kasa ni shinggrup nna U Dang tawn da ai shara de sit sa wa ai hpe nawku jawng kata na hpung masha ni yawng mu lu lai wa sai lam, hpung masha ni gaw hkrit gajawng nna kyu hpyi, Rosary hti ngai lam, yup tung ram rai yang hpung masha Nu Maria Litany tsun htum ai hte Nawku jawng kata na wan shadaw gaw tsawm ra na hkra si mat nna, gade n na yang a gajawng sha bai htoi tu wa ai lam, n dai wan shadaw a htoi tu ai lam gaw laga ten na hte n bung ai sha alak mi htoi tu nna Nawku jawng kata ting a san rai mat wa ai lam, tsawm ra na hkra n dai zawn htoi tu nga na shawoi na hte maren bai rai mat wa sai lam, n dai wan shadaw a kaw na pru ai manam pyaw la ai sama mung nawku jawng ting tsawm ra na hkra manam pyaw taw wa sai lam ni tsun sak se hkam lai wa sai.
K. NAW NAW
No comments:
Post a Comment