WA SARADAW NI HPANG DE

Malaysia KCCM a Shiga Shana ai Lam

Hkristu hta tsawra hkungga ai Wa Saradaw ni hpang de,

Malaysia Mungdan hta kanbau bungli galaw let sa du nga ai Myen Mung de na Kahtawlik Nawku Hpung masha ni hte seng nna lai wa sai Hkrismat laman hta na mahkrum madup ni hpe tang madun dat ga ai.

1. CHYEJU DUM GA AI:

a. Hpa nchye nchyang ai wa raitim ngai hpe dai mung dai ga de sa du lu na hte dai kaw shanu nga ai Hpung mahsa ni (grau nna KCCM) hte rau 2010 Hkrismat Poi lu shang lawm lu hkra lam woi ningshawng ya ai Hpan Madu Karai Wa hpe ndang tsun hkra chyeju dum nngai.

b. Tinang buga hta sasana magam bungli ni law nga tim ngai hpe hkawm sa hkawm wa lu na ahkaw ahkang jaw ya ai Wa Saradaw ni (grau nna seng ang ai Wa Saradaw Philip) hpe chyeju dum nma rai nga ga ai.

c. Tinang nang a bungli ni hte nrau nhtau rai nga ma timung, ngai hpe dai mungdan de lu du shang sa wa lu hkra invitation laika lajang ya, hkawmsa hkawmwa jarik jaga sha nka ra mara, nga shara, malu masha kaw nna hkawt lajang ya, garum ya n gun jaw, hpaji jaw lai wa ma sai Malaysia du nga ai Hpung masha ni (grau nnaKCCM) hpe aja awa chyeju dum nngai. Chyeju Atsam Madu Karai Wa yawng hpe shaman chyeju n hpaw n ya jaw ya nga u ga.

2. MAHKRUM MADUP LAM NI:

a. Tinggyeng hpaji hparat lam ni, myit masin n gun atsam ni, wenyi makam masham machye machyang jat ai sha n ka n gun atsam awai la lu ga ai.

b. Hpung masha ni nga ai shara law law kaw lu du kau da let, mara raw sakramentu jaw, akyu hpyi ya, Missa Hkungga ap nawng ya lu ai a majaw hpung masha ni a matu wenyi n gun atsam lu la shajang ma na kam ai. Langai hte langai nga ai shara tsankan hkat ma ai, Bungli shang aten nbung ma ai. Dai majaw yawng hte rau hkrum lu na matu n loi ai lam mu lu ai. Bungli shang ten lani mi nayi 8 - 12 du rai ma ai. Laban shani bungli nhkring ai ni law ai.

c. Hkungran sakramentu la ra ai ni grai law nga ma ai raitim masa amyu myu a majaw yawng hpe n lu jaw kau da ai lam nga. N kau mi madi shadaw laika n du ai, n kau mi n chye hpyi ai, n kau mi dai kaw na seng ang ai jau ni hte n chye matut mahkai ai, nkau mi gaw dai hku sha htunghking lam mung nchye galaw rai nga sha nga ai ni rai ma ai. Mungdan kaga, Sasana kaga re majaw law malawng hpe gaw matut galaw sa wa na lawng lam ni sha lu matsun da nngai.

d. Myen mung de na Malay de du nga ai hpung masha yawng 3000 Hkying masum chyan nga. Wunpawng (KCCM) ni 350 ram nga ma ai. KCCM hta machye machyang hte wuhpung wuhpawng hpe chye woi awn ai atsam lu ai ni nga shajang ma ai. Tinang kanbau bungli lam hkyin nga tim tinang myu sha hte nawku hpung lam hta mung grai shakut nga ma ai lam mu lu ai.

e. Law malawng UN cards hte sha nga nga ma ai. Magam bungli hta awngdang ai ni nga ai zawn nkau ni grai yak nga ma ai. Jahkring hkring bungli htawt galaw hkawm ma ai. Kani, tsa nanghpam tsi mawan chye lu lang ai ni mung nga ma ai. Machyi makaw hkrum ai ni, AIDS lu ai ni du hkra rai ma ai. UN rung hte matut nna sha nga ai ni mung lawm ma ai.

3. TANG MADUN AI LAM NI:

1. Shaning shagu wunpawng jau langai ngai lu sa ya yang kaja ai. Dai kaw lit hkam jau nga ai rai tim anhte a hpung masha ni na matu ra ai made lu galaw ya na matu nloi ma ai.

2. Jau ni sa jang seng ai Wa Saradaw ni kaw nna madi shadaw laika hte CELEBRATE la sa nhtawm dai kaw na saradaw, jau ni hte shawng sa lu matut la yang kaja ai.

3. Nlaw htum shata mi ram rai nna poi a matu sa jang gaw loi jau sa lu nhtawm, dai kaw nga ai hpung masha ni hpang shanhte nga ai lawk shara hkan sa du kawan, ra ai lam ni tau nau sa lu lajang yang mai ai.

Ngai mung hkawm sa hkawm wa rai, Email lang na mung masa nau njaw ai majaw shiga shana hpang hkrat ai hpe chye na ya ma na kam ai.

N hkum ntsup ai kaw chyeju hte jahkum shatsup la ya ma na hpe aja awa kam nngai.

Hkristu a magam hta,

Jau Joseph Jangmaw Din