Kachin Catholic Community In Malaysia

KCCM LANING MI HPRING SAI

2011 ning January praw (1) ya shani gaw Malaysia Mungdan du Wunpawng Jinghapw Kahtawlik Hpung masha ni myit hkrum myit ra let jawm hpaw ninghtan da ai Kachin Catholic Community In Malaysia (KCCM) Laning mi ladu hkrum sai. Laning mi du hkra lam woi madum, myit nyan hpaji jaw ya ai Karai Wa a chyeju hpe shakawn ai.

KCCM nnan hpaw hpang wa ai kaw nna, yaw shada lam masing ni jahkrat le galaw sa wa ai hta awng dang ai lam ni law law lu la wa sa ga ai. KCCM hpung masha ni a matu Wenyi makam masham lam hta a tsam dat shakut shaja sa wa ai majaw hpung masha ni makam masham lam hta grau n gun dat shang lam wa ai, grau shakut shaja wa ga ai. Hkungran Sakram Mintu n lu ai hpung masha ni law law mung lu la wa sai. Hpung masha ni nga ai de kyu hpyi gawan ai lam ni shawng de n nga ga ai rai tim KCCM hpaw ninhghtan ai kawn n dai lam ni hpe lu galaw wa saga ai. Ma kaji ni hpe Kashin Kamun lu hkra, Chyoi Pra hkum lu hkra mung garum shingtau ya lu sai. Yak hkak jam jau hkrum ai ni hte, machyi makaw hkrum ai ni hpe mung KCCM kawn garum shingtau ya lu sai.

N dai zawn galaw lu ai lam ni gaw KCCM hpung masha ni marai hkum shagu myit hkrum myit ra ai hte shang lawm ai a awng dang lam ni rai nga mali ai. Anhte hpung masha ni myit hkrum ai a akyu chyeju ni hpe dai ni hkam la lu saga ai re. KCCM a marang e hpung masha ni makam masham lam hta grau shakut wa ai, shada myit hkrum gumdin ai lam grau lu la wa ai, shada garum shingtau chye wa ai, chyasam mungdan kaw nga ai ten hta shada grau myit kap let Myu Htunghkring hpe tsawra manu shadan chye wa ai lam ni hpe lu la ai.

KCCM matut nna nga kang grin nga lu na matu, anhte hpung masha ni marai hkum ting dek shagu kaw lit nga ga ai. Dai re majaw anhte hpung masha ni shada myit garan gachyan ai lam n nga ai sha myit hkrum myit ra let KCCM hta shang lawm let shakut sa wa ga ngu hpung masha ni yawng hpe matut nna saw lajin mayu ai. KCCM hte rau sha lata gindun let hkawm sa wa ga. KCCM hta shang lawm let shada garum shingtau la nga ga.

KCCM hpe tut e hpaji jaw, n gun jaw, lam madun ya nga ai, Myitkyina, Lashio, Manmaw ginwang de na Wa Saradaw ni hte Jau, Mama ni yawng hpe mung n dang tsun hkra chyeju dum shagrau ga ai. KCCM hpung masha ni a matu Wenyi lam hta garum ya nga ai Kuala Lumpur na jawng dung Wa Jau Kaba James, Good Shepherd Jawng dung Wa Jau Patrick hte KCCM hpung masha ni hpe lam a myu myu hku garum la ya ai Setapak na hpung masha ni yawng hpe mung chyeju dum dat lu n ngai. KCCM hta Laning mi tup shang lawm ap nawng magam gun lai wa sai mu gun ni yawng hpe mung n dang tsun hkra chyeju dum shagrau dat lu n ngai. Karai Wa tut e bau sin makawp maka shaman chyeju jaw ya u ga.

Hkristu a magam hta,

Shd. Paul Kaiji Naw Naw
Amu Madu
KCCM
Malaysia