HKRISMAT A LACHYUM

Maigan mung shara shagu hkan e lam a myu myu hte du hkawm nga ai wunpawng myu sha jinghku jingu kahpu kanau ni yawng hpe ngwi pyaw sim sa ai Hkrismat poi rai u ga ngu kabu gara ai hte shahkram dat lu ga ai. Hkrismat shata n htoi bai du wa sai, anhte yawng anhte a buga de na Hkrismat poi hpe grai dum marit nga na hpe kam dat ai.

N dai dicember 25 ya shani hta munkan ting hta ma Yesù shangai wa ai poi hpe galaw ma ai. Hpa rai nnandai25 shani hpe Madu Yesù shangai ai nhtoi masat da ai kun?

Chyum laika hta Madu Yesù December 25 hta shangai wa ai lam n tsun da ai, raitim moi kaw na hkristian hpung masha ni n dai 25 ya shani hta e Madu Yesù shangai poi hpe galaw hpang wa sai re ai lam hpe anhte na lu ga ai. Hpa rai nna 25 ya shani hpe lata ma a ta?

Moi na maigan myu sha ni Karai Kasang hpe n chye shi ai ni n dai dicember 25 ya shani hta e Jan nhtoi shangai shapra wa ai poi hpe galaw lai mat sai re, dai myu sha ni hpung shang wa ai shaloi, Madu Yesù gaw anhte a matu Jan n htoi re ai ngu nna ndai December 25 ya shani hpe Madu Yesù a shangai poi galaw hpang wa sai re.

Madu Yesù gaw anhte shinggyim masha yawng a matu n htoi madu nan rai ga ai. Karai Kasang a Kasha shingtai rai tim mung shi a hpung shingkan hpe n madun ai sha grit nem ai hte Betlehem mare hta e matsan mayan rai nna shangai wa ai gaw anhte ni mara a majaw matsan mayan rai ai ni hpe hkye la na matu rai nga ai. Shi a Mungga gaw anhte a matu nhtoi nnan rai nga ai, dai Mungga hta hkye la lu na atsam rawng nga ai, dai rai nna anhte a prat hta mung hkye hkrang la ai chyeju lu na matu Shi a Mungga hpe hkam sham hkang nang shadik ra ga ai, htingbu wa hpe tsaw ra garum ai hte matsan mayam re ai ni hpe garum shingtau na matu Madu Yesù nan anhte hpe ga htet da ai.

Dai rai nna n, dai shaning na Hkrismat poi hta e anhte galaw lu galaw jin ai daram jam jau hkrum nga ai ni, matsan mayan rai nga ai ni hpe shawng myit jaw ya nga ga ngu n gun jaw let “Merry X’mas” ngu yawng hpe shakram dat lu ga ai.

Wa Jau N Hkai Tang Gun

(Italy)