KCCM HPUNG MASHA NI A 2013 WUSAWK

KCCM Magam gun ni woi awn let, KCCM Hpung masha ni hte rau, August (4,5) ya shani hta Cameron Highland de sa nna myit sumru wusawk hte hkring sa la ai lam hpe galaw lai wa saga ai. Cameron Highland de August (4) ya jahpawt hkying (8:00 AM) ten ram hta rawt nna Cameron Highland de shani hkying (12:30 PM) ram hta du shang wa ai. Cameron Highland de du shang wa ai shaloi San Joseph Ginwang up Wa Jau Eugine kaw kabu gara ai hte hkap tau hkalum la lai wa sai. Shana de hkying (5:00PM) ten hra Chyoi Pra ai Missa Hkungga hpe Wa Jau Eugine kawn Jinghpaw Ga hku nawng ya lai wa sai, KCCM Hpung masha ni mung Jinghpaw Htunghking Htawng, Shup Sheng ni hte Nawku Mahkawn lai wa sai. Matut nna shana daw hta Nu Maria sumla hpe Nawku jawng grup yin hpai shinggrup nna akyu hpyi ai lam hpe mung galaw la lu saga ai. Shana de hkying (10:00 PM) ten ram hta Nawku Jawng ndaw pa hta Wan Jang Jang nna Wa Jau hte rau KCCM hpung masha ni shada shachyen shaga ai lam, ginsup pyaw chyai ai lam, yu ngwi mahkawn ni hte ka manawt ai lam ni hpe galaw lai wa sai.

August (5) ya jahpawt hkying (7:30 PM) ten hta Sara Paul Kaiji Naw Naw kawn woi awn let, akyu hpyi myit sumru ai lam, Rosary hti ai lam ni hpe galaw la lai wa sai. Dai hpang hpung masha ni kawn manap shat hpe jawm sha la let Cameron Highland a mying gumhkawng ai, Nampan Sun, Namsi sun, shat mai shatmaw hkai sun ni de hkawm chyai lai wa sai. KCCM hpung masha ni kawn San Joseph Nawku jawng de bai wa nna shani shat ni hpe jawm sha lam nhtawm Wa Jau Eugine kawn shaman ya ya ai hpe hkam la let bai nhtang wa sai lam, wa lam hta Hpalap sun, Hkarum ni hkan mung hkawm chyai nna KL de bai nhtang wa saga ai. Shana de hkying (8:15 PM) ten ram hta KL St. John Nawku jawng de a ngwi a pyaw hte bai du wa lu sai. Ndai Cameron hkun lam hta KCCM hpung masha ni yawng marai (63) tup shang lawm lai wa sai.