KCCM EASTER HTUNGHKING KA MANAWT

Malaysia Mungdan du Jinghpaw Wunpawng Kathawlik Hpung (Kachin Catholic Community In Malaysia KCCM) kawn 2013 March (31) Pasaka Laban shani Kuala Lumpur Mare kaba na St. Anthony Nawku Jawng wang na hpung htingnu kaba hta Easter Jinghpaw Htunghking Ka Hkrang hte Yu Ngwi Pinra lamang hpe galaw lai wa saga ai. N dai lamang hta KCCM magam gun ni kawn lit la let woi awn galaw sa wa ai rai nna KCCM Hpung masha ni yawng myit hkrum myit ra hte sa du shang lawm lai wa sai. Lamang hpe Shaning hkying (2:00) ten kawn shana de hkying (7:00) ten du hkra galaw lai wa sai hte n dai lamang hta MCCM lit hkam tarahkaw Sara Francis Hkawm, KCCM wenyi lit hkam Sara Paul Kaiji Naw Naw ni kawn sa du n gun jaw mungga shaga la lai wa sai. KCCM Ningbaw Slg. James Gyidu La Hkam kawn hkalum mungga shaga la nna, KCCM Amu Madu Slg. Patrick Lahtem Yaw Htoi kawn KCCM a labau hpe tsun hkai dan lai wa sai. KCCM hpung masha ni myit hkrum myit ra hte sa du shang lawm lai wa nna shana de hkying (7:00) ten ram hta lamang hpe awng dang ai hte shangut la lu saga ai.