Lani mi hta Howard Kelly ngu ai ma kasha langai gaw shi a jawng jarik lu na matu nta langai pru langai shang rai hkan dut hkawm ai. Dai zawn rai hkan dut hkawm nga ai ten, shi grai kan si rai tim jawng shabrai n law na tsang ai majaw hpa mung n mari sha ai. Nau kan si wa ai majaw bai du na nta kaw lama ma hpyi sha na matu myit tawn da nu ai.
Rai dut na nta chying hka lam kaw du ai hte grai tsawm ai mahkawn kasha langai mi hpe shi mu dat ai. Shi gaw grai tsawm ai mahkawn kasha hpe mu dat ai majaw shi a kan si ai lam hpe jahkring mi gan malap kau nna num kasha dai kaw hka gawm mi sha hpyi lu dat ai. Num kasha dai gaw gat sa dut ai la kasha grai kan si taw ai re hpe mu chye nna, shi hpe nga chyu gawm mi jaw lu dat ai.
Gat dut ai la kasha gaw nga chyu hpe abwi sha lu la nhtam, num kasha hpe san dat ai gaw, “ngai nang hpe gara hku bai chyeju htang ra na rai ta?”
Shaloi num kasha gaw, “nang ngai hpe hpa chyeju mung n htang ra ai, lama ma bai lu la na hpe myit mada nna masha hpe galoi hkum garum nga nye Nu tsun ga ai.” ngu nna bai htan dat wu ai.
La kasha gaw dai num kasha hpe chyeju dum ai lam tsun da nna jawng shabrai lu na matu gat bai matut dut hkawm mat wa ai.
Shaning law law na mat wa ai hpang, num dai gaw machyi kaba hkrum wa ai. Shi a ana hpe shanhte a mare kaw sha tsi n mai ai majaw, tsi sarawun kaja htum ni nga ai mare kaba de tsi tsi hkam la na matu du sa wa ai. Dai Num a ana hpe tsi lajang na matu dai mare na ningtawn ai tsi sara ni law law wa zuphpang galaw ma ai kaw Dr. Howard Kelly mung shaga hkrum ai.
Dr. Howard Kelly gaw num dai a mare mying hpe na dat ai hte shi myit hta amyu mi nga hkam sha wa ai majaw, shi a tsi sarawun palawng hpe hta dagraw la nna lang dat dai num kasha tsi tsi hkam la nga ai gawk de rawt sa mat wa ai. Dai num hpe mu ai hte shi matsing mat ai majaw, zuphpawng galaw nga ai de bai wa nna num dai hpe atsam htum hkra shi tsi ya na lam hpaw tsun wa ai.
Dai aten kawna Dr. Howard Kelly gaw n hkring nsa dai num a asak hpe hkye la nu la na matu shakut shaja lai wa sai. Dr. Howard Kelly shakut tsi lanang ya ai majaw, Num dai gaw machyi kaba hkrum ai kaw na mai tsai wa sai.
Dr. Howard Kelly gaw tsi rung kaw hkrat ang ai Num dai a tsi manu jahpan hpe shi hpe jaw na matu hpyi shawn wu ai. Num dai a hkrat ang ai gumhpraw jahpan laika pa hpe mu jang Dr. Howard Kelly gaw dai masau pa jut shara mi kaw laika kadun mi ka nna Num dai hpang de bai sa dat ya ai.
Num dai gaw dai ram mying dan hkung nna, manu hpu dik ai tsi rung kaw tsi tsi hkam la ai re majaw, shi a tsi manu gade hkrat ang ai ngu hpe yu na matu pi n gwi mat ai sha n ga, myit mung grai n pyaw rai mat ai.
Shi gaw n wam la let sha, shi a tsi manu jahpan laika pa hpe yu dat yang,…
"Paid in full with one glass of milk, Dr. Howard Kelly,” nga ka da ai hpe mu hti ai majaw shi a myi sha ni hta kabu myit prwi ni hte hpring rai ing taw nga ai.
Tsawra ai Nu Wa Hpunau ni e, anhte hku nna ra gadawn nga ai marai langai ngai hpe garum ga yang, shi kawn lama ma bai lu la na hpe myit mada let garum sa wa nga ga ai kun?
Madu Yesu anhte hpe sharin ya ai lam gaw, “Nang kaja ai amu galaw yang, na a hkra lata galaw ai amu hpe, na a pai lata n chye lu u ga.” Mt. 6:3
Sara Paul K. Naw Naw
No comments:
Post a Comment