Mali kaja n htoi mahka, July shata 26
Jinghpaw hku gaw Sangan ta
Marang kaja, yinam ta
Mungkan ntsa, malap n lu na
Chyeju madu Nu yan wa a poi bai du sai rai…
Hkik hkam poi, dai ni na n htoi
Annau ni yawng a malai
Chyeju madu Nu Wa ni yawng hpe
N dai awba laika hte shakawn shagrau, hkungga jaw dat n ngai law.
Oi….., Nu a hkri tung, ngai gaw naw hkalung
Mungkan ntsa, gara hku rai n pra
Nu yan Wa sha n nga yang wa
Dai ten kaw nna
Chyinghkai Nu gaw
Machyi shoi chyum, a kan sha magum
Sha mayu ai mung n wam sha,
Hkri tung na ma hpe n kam ja hkra,
Akan sha masawp, nye kasha shamawt n shamawt
Si na ntsang, si du hpe gumlang
Salat she hprwi, sai tum she li rai nna
Annau ni hpe shangai shaprat dat sai rai..
Mungkan a n htoi
Lamu a jan hpe, mu hkrup ai ten kaw nna
Nye a prat a n pawt n hpang, Nu a chyu dwi nnan
Hpa hpe mung rai n chye myit, Nu a chyu hpye sha marit
Nu a n htum lu ai tsaw myit, annau ni yawng a shingnip
Nu a tsaw myit n lu yang wa, annau ni gara hku n pra
Mungkan n tsa, shadawn n lu ai gaw
Chyinghkai Nu a tsaw myit nan rai mali ai.
Chying hkai Wa ai chyeju mung n mai malap,
Annau ni yawng hpe shaprat
Kasha myi man mu lu ai ten kaw nna
Kabu n gun, lamu n dung
Shi myit hta wa, ngai Kawa rai sai nga
Lahpum shachyen, hkrit myit hpe shaden
Nye kasha ni myit man n kaji u ga ngu,
Mungkan a sut hpe shi tam, u a hpre ai gaw hpang lam
Jahpawt jau jau rawt, a jan pi rai n shamawt
Hkau na pa de sa, ma ni sha na a mam nga
A nga sha gawt, na hking sha garawt
Ji grawng shat gaw shayaw,mayan gaw majaw
A jan gade mi ja, marang mi a sha rai
Yak hkak hkrum rai tim,
Kasha myi man mu lu yang wa, Shi myit hta ba mai sai nga
Bu hpun na mung n tsang ra, sha na mung ntam ra hkra
Chying hkai Wa gaw, annau ni hpe
Tam jaw tam bau, maka lai wa sai rai….
Hpung lam hta woi gin lum, Karai mungga hpe madun
Nawku hpung madung Karai a lam
Laban nawku jawng de woi sa, annau ni yawng hkum ra
Hkristan myit hpe bang ya, annau ni a ntsa
Kasi kaja jaw ya ai gaw
Chyeju madu Nu yan Wa nan rai…
Dai hta n ga,
Mungkan hpaji, laika chye hti
Laika jawng de woi sa, hpaji sharing la u nga
Yak hkak lam hpe myit hkum tsang,
hpaji n chye na hpe she tsang u nga
Mungkan n tsa n lu ai hta, n chye gaw grau yak ai nga
Sharin shaga, tsun madun let
Hpaji jawng de sa shangun ai mung, nu yan wa nan rai
Hpaji sharin la a ten hta rai tim
Tingsan gaw je wa, laika buk gaw kata wa
Jawng gawk hta, hta ai gumhpraw wa
Nu yan wa myit hta gahpra sai nga
Ma ni hpe gaw jaw mayu, n gu yam hpe sha hpaw yu rai
Myit ru myit tsang hkrum tim
Nu yan Wa gaw masha lahkam hpe woi shingkawt
Jam jau lam hpe a dawt rai nna
Annau ni hpe hpaji jaw ya sai rai….
Myu sha lam hta mung n hprang hkrat
Shachyen shaga lam hta mung n dinghprat
Kanawn mazum lam, masha yawng a manang
Wunpawng Nu yan Wa a kasha tai
Masha man hta a rawng la sai
Annau ni a masin hta wa, my tsaw myit hpa bang ya
Ngai Wunpawng Shayi Shadang sha
Gadai my hpe mung n hkrit ra
Shawa hpawng hpe ga, masha man hta nga ya
Dai ni annau ni wa, shawa man hta myi man pa
Annau ni a ningbaw tai, prat a majan hpe n hkrit sai
Marai rawng ai myit ni wa, annau ni yawng a n tsa
Masin kata dawk bang ya ai
Nu yan Wa nan rai.
Tsawra myit gade kaba
Sak jaw lam hta ntsun ra hkra kaja rai tim
Annau ni wa Nu yan Wa ntsa
Shut shai kau sai mara ni wa
Tawngban na pi n mai sana
Nu gaw sinpraw de sa u nga, ngai gaw sinna de sa
Wa tsun ai mung n madat, nye myit hpe sha shawng de dat
Pyaw lam hta baw bang ai wa, Nu yan Wa hpe pi malap sai nga,
Mungkan ntsa annau ni wa,
Nu yan Wa n tsa, n chye myit ai wa,
Annau ni a mara kaba rai sai re…
Rai tim Nu yan Wa gaw
Annau ni a tsa, mara n sawn ai nga,
N hkru ai ma hpe grau tsaw ai bai nga
Annau ni gade mi shut rai tim,
Mani sumsai let sha, Mara raw ya nga ai
Nu yan Wa nan rai….
Nu yan Wa a tsaw myit wa, n hkyet lu ai hka hpawt hpa
Na wa magang grau she lwi bang
Annau ni a masin hta wa, panglai hka hta pi grau kaba
Nammuk dara panglai, gade kaba dam la da rai tim
Nu yan Wa a tsaw myit gaw grau she dam lada
Annau ni a ntsa, htoi tu ai wa
Jan shata htoi ai hpa,
Nu yan Wa a chyeju tut lwi nga
Panglai hta pi grau kaba
Shadawn n lu sana, mungkan ntsa
Nu yan Wa a tsaw myit ni wa
Annau ni a ntsa dam lada kaba la nga ai rai…
Chyeju madu Nu yan Wa a poi n htoi hta
Annau ni wa myit malai sana, myit su sana
Nu yan Wa ra ai hku sha hkawm sa na
Annau ni shut ai mara, kalang bai raw ya
Hpang de nna gaw n shut lu hkra shakut na nga
Ga sadi jaw let,
Chye Wa Ningchyang, Hpang Wa Ningsang
Madu Karai kaw
Chyeju madu Nu yan Wa
Myit pyaw hkam kaja ai the
Annau ni hte shaning law law wa, rau nga lu u ga ngu,
Kyu hpyi ya let,
N dai Awba laika hpe
Hpung dim dat n ngai rai…
