YESU HPANG JAHTUM TSUN AI GA (7)

Malaysia Mungdan du Catholic hpung masha ni (MCCM) kawn woi awn let Madu Yesu Hkrung Rawt ai Paska Poi hpe awng dang ai hte galaw la lu saga ai. Paska Poi hpe April (7) ya shana na maga hkying (6:00pm) ten hta Kuala Lumpur na St. John Nawku Ningnu Kaba hta Wa Jau Jerome the Wa Jau Anthony yen kawn Misa Hkungga nawng ya lai wa sai. N dai Paska poi hta Hpung masha nnan marai (20) jan hpe mung Kashin Kamun hte N Gun Shaja Chyeju kum la hpe jaw ya lai wa sai.

<-- Paska Wan Shadaw Shaman nga yang

Hpung Nnan Shang ai ni hpe Kashin Kamun hte N Gun shaja jaw nga yang ->

April (8) ya Paska n htoi shani hta gaw Kuala Lumpur, St. Anthony Nawku Jawng Kaba kaw Paska Poi Lamang hpe MCCM kawn woi awn let hpung masha ni hkrum hkrum ra ra sa du shang lawm nna awng dang ai hte galaw la lu saga ai.

N dai Mungga (7) gaw Madu Yesu hpe kam sham ai Hpung masha shagu a matu manu dan ai mungga rai nga ai. N dai mungga ni hpe anhte jam jau jam hkau hkrum ai ten ni hta shing nrai, myit daw myit hten ai ten ni hta n gun a tsam lu la na matu hte mahtai lu na matu hti sum ru yu mai nga ai.

1. Wa e shanhte a mara dat kau ya rit, shanhte galaw lam ai hpe shanhte n chye ma ai. (Lk 23:34)

Mara dat kau ya ra ai lam hpe Madu Yesu sharin ya ai. Madu Yesu gaw shi hpe zingri zingrat ai ni, shi hpe sat na matu lajang ai ni, dai sat ai a mu hta lawm ai ni, shi hpe sat ai ni yawng a mara hpe raw dat ya na matu Kawa hpang de akyu hpyi ya ai. Madu Yesu gaw Shi hkaw tsun ai lam hpe Shi hkum nan hkan galaw ai re. (Lk 20:27-28) Madu a kyu hpyi ga hta mung Masha ni anhte hpe shut ai mara anhte raw kau ya ai zawn anhte a mara hpe mung raw kau ya rit nga sharin ya ai. San Stephen gaw shi hpe sat ai ni a mara ni hpe raw dat ya ai. (Kasa 7:60)

2. Ngai, Nang hpe teng teng tsun de ga, Dai ni jang nang Ngai hte rau Hparadisu e nga na rai nga ai. (LK 23:43)

N dai mungga gaw hkye hkrang la hkrum ai mungga rai nga ai. Madu Yesu udang hta jen da hkrum ai shaloi Shi hte damya lahkawng mung lawm nga ai. Udang hta noi nga ai damya langai mi gaw Nang gaw Hkristu n rai ni, Na hkum hte an hpe mung hkye la myit nga jahpai asawng ai. Bai langai mi gaw “Madu e nang mungdan de du wa yang ngai hpe dum rit law” ngu nna hpyi ai. Mungga n dai gaw chyeju lu ai, myit mada lam hpe hpaw ya ai mungga rai nga ai. Adam yen Eva a shut hpyit mara a majaw shamat kau ai sumsing chying hka hpe Madu Yesu a marang e bai hpaw ya ai hte anhte yawng hkye hkrang la ai hkrum lu sai.

3. “Numsha e ningsha hpe yu u, dai Sape hpe mung Ning Nu hpe yu u.” (Yh 19:26-27)

N dai mungga gaw Kasha hte Kanu a lapran na tsawra myit kaba rai nga ai. Nu Maria gaw anhte yawng a Kanu rai nga ai hpe mung madun ya ai. Hkanan mare hkungran poi hta Yesu chyawm gaw “Numsha e Ngai nang hte hpa seng a ta, Nye a ahkying n du shi ai” ngu wu ai. Madu Yesu shi a Kanu hpe Numsha e ngu na tsun ai (Yh 2:4, Yh 19:25-27) gaw bung nga ai. (Npt 3:15) hta tsun ai num sha gaw Maria rai nga ai hpe mung madun ya ai. Eva Karai Kasang a ga n madat ai majaw shinggyim masha ni mara hta shang mat sai raitim mung Maria madat mara ai a majaw anhte yawng a matu hkyehkrang la ai lam hpaw ya sai.

Laika man (4) de >>>

4. Nye a Karai Wa e, Nye Karai Wa e,, Nang Ngai hpe hpa na kau da n ta. (Mt 27:46, Mk 15:34)

N dai mungga gaw gabai da hkrum ai shing n rai garen gari ai lam rai nga ai. (Shk 22) n dai gaw shinggyim masha a tai hku na Madu Yesu hkam sha ai machyi kaba rai sai. Hkum ting a hpye a lam rai tim Udang hpe Kalawari kawng de du hkra hpai ra ai. Shi gaw garen gari hkrum ai hte gabai da hkrum sai, Shi tsawra ai Kasa ni mung shi hpe kau da ai, Kasa Yawhan sha shi makau kaw nga ai. Madu Yesu nni kri hkrum ai hte u dang n tsa e si hkam ai lam hpe myit sumru yu ai a marang e shut hpyi mara gaw gade wa n hkru n kaja ai, Yesu hpe gade wa asawng asang chyeju n htang ai lam rai nga ai hpe anhte dum chye ra ai. Shut hpyit mara hpe koi yen kau nna Karai Kasang a mungga lam hta hkawm sa na matu shakut ra ai.

5. Ngai hpang gara n ngai. (Yh 19:28)

Yesu gaw Shi a mu ma hkra ngut ai hpang Ngai hpag gara n ngai nga tsun ai. Madu Yesu nni n kri yubak hkam la ai lam nnan hpang ai kaw na ngut kre ai du hkra byin wa ai lam ni hpe yu yang Shi kaja wa hpang gara sai. Anhte hpe hkye la na matu Madu Yesu gaw nni n hkri hkrum ai hte hpang gara hkum sai. Madu Yesu a marang e anhte shinggyim masha yawng hpang de galoi hpang gara n hkrum sai. (Yh.Shr 7:16 shanhte gaw hpang de galoi mung hpang gara n hkrum na masai.)

6. Ngut mat sali ai. (Yh 19:30)

Madu Yesu, Shi galaw ra ai magam ngut sai, hkum zup sai hpe tsun ai rai nga ai. Kawa a ga hpe si ai du hkra madat mara ai hte shinggyim masha ni hpe shi gade ram tsawra ai lam hpe madun ya ai. Adam a n madat mara ai lam a majaw mara gaw mungkan ga de du wa ai, Madu Yesu a marang a anhte yawng gaw htani htana asak hpe lu la ga ai. Madu Yesu hpe kam sham ai hpung masha shagu mung Shi a kasi hpe hkan nang ra ai. Dai ni anhte asak hkrung hkawm sa nga ai aten hta Karai Kasang a tsawra myit, Shi a yaw shada ai lam ni hpe sakse hkam let hkan galaw na matu rai nga ai.

7. Wa e, Nye a Wenyi na lata de Ngai ap ya de ai. (Lk. 23:46)

Hpang jahtum Madu Yesu tsun ai Mungga rai nga ai. N dai mungga hpe (Sh-k 31:5) hta mung mu lu ai. N dai kyu hpyi ga gaw Yuda amyu Kanu ni shanhte a kasha ni hpe sharing ya ai shana yup ra shang kyu hpyi ga rai nga ai. Madu Yesu Shi a wenyi hpe Kawa a lata de ap ya ai. Shi a Kawa hpe myit masin hkum hkrang ma hkra hte kam sham shingbyi shanat ai lam rai nga ai. Madu Yesu gaw Shi a Kawa hte galoi mung matut mahkai let akyu hpyi let hkyehkrang la ai magam bungli hpe gun hpai ai. Dai zawn anhte hpung masha ni mung Kawa Karai Kasang hpe myit masin hkrum hkra mahkra hte kam sham shamyet shanat let sak hkrung hkawm sa ra nga ga ai.

Fr. Leo

Phlippines