Ndai Mungkan ga ntsa e nga pra ai anhte shinggyim masha ni hta bawng ring rawt jat ai lam nnga yang gaw yawm ai lam sha nga na rai nga ga ai. jDai rai nna, majoi mi dung taw nna gaw hpa mung nbyin wa ai nga ai hte maren bawng ring rawt jat wa na matu ahkying aten hpe manu shadan akyu jashawn jai lang ranga ga ai. Bawng ring ai ngu ai hta myit masa bawng ring ai, hpaji machye machyang bawng ring ai, wenyi bawng ring ai, sut masa bawng ring ai, amyu lam yan hta mung bawng ring ai lam hpe tsun dan mayu ai.
o Myit masa bawng ring wa na matu tinang a myit masin hpe shawng gram lajang la ai hte shawang tsawra myit kaba rawng ra nga ga ai. Shawang tsawra myit nrawng ai wa hpe gaw myit masa bawng ring ai ngu nlu tsun nga ai. Madu a kabu gara shiga hta, na manang wa hpe na hkum the maren tsawra u nga nna tsun da nga ai. Dai majaw shawang tsawra myit gaw grai nan ahkyak la nga ai.
o Hpaji machye machyang mung masha langai mi a prat hta ahkyak dik ai lam langai rai nga ai. Hpaji machye machyang gaw htum ngu ai nnga ai, raitim, hpaji machye machyang nnga yang gaw lam shagu hta hkrat sum wa chye nga ai. Hpaji machye machyang gaw tam ai wa a matu hpang hkrat ai ngu ai nnga na re, ra sharawng ai myit sha ahkyak rai nga ai.
o Wenyi lam hta mung bawng ring wa na ahkyak kaba rai nga ga ai. Wenyi lam hta bawng ring wan a matu gaw tinang hkum hpe shawng tinang san dinglik yu ra nga ga ai. Ngai hpe kadai hpan da ai kun? Ngai hpe hpan da ai gaw hpa baw majaw hpan da ai kun? Kade a matu hpan da hpan da ai kun? Hpa baw galaw shangun ai kun? Hpa baw tara ni hkan shatup ra ai kun? Hpan da ai wa a ra sharawng ai gaw hpa rai kun? Ngai hpe hpan da ai wa hpe ngai chye nga nngai kun? Shi a matsun hte maren ngai madat mara hkawm sa nga nngai kun? Ngu ai lam ni ma hkra hpe myit sumru, htai lu yang gaw wenyi lam hta bawng ring wa sai lam rai nga ga ai.
o Sut masa bawng ring wa na matu baw nu, hpaji, machye machyang hpe asung jashawn n-gun dat sa wa ra ga ai. Sut masa bawng ring wa ai ni gaw shani shana nhkring nsa shakut nna she bawng ring wa ai ni law ma ai. Sut masa magam bungli n’galaw ai wa gaw sut masa bawng ring wa na nmai byin nga ai. Sut masa lam hta bawng ring ai lam nnga yang gaw prat madang lam hta mung naw hpang hkrat nga na sha rai nga ga ai.
o Amyu lam yan hta mung bawng ring wa ra saga ai. Tinang lagaw tinang tsap lu hkra shakut let, tinang a nga shara hpe tinang makawp maga, tinang a myu sha yawng hpe mung makawp maga pawn ba la na nang, ngai a lit rai nga ai. Tinang myu sha kahkyin gumdin wa na mung nang, ngai hta lit nga ga ai. Tinang gaw jinghpaw wunpawng myu sha langai mi rai nga ai hte maren myu hpe , mung hpe tsaw ai myit ni rawng nga nna, ta tut makawp maga yang chyu sha amyu lam yan hta bawng ring ai ni anhte tai na ga ai. Anhte a labau hpe anhte ka jahtuk la ra saga ai.
o Manu dan ai prat hpe masha shagu gaw gaw gap ra ga ai, raitim, masha langai lahkawng gaw tinang a hkum hpe manu n’shadan ai sha nga shalai kau ai mung nga chye nga ai. Karai hpan da ai shinggyim masha yawng gaw manu dan ai shinggyim masha hkrai rai nga ga ai, dai majaw tinang hkum hpe tinang nmai daw dan ai zawn manang wa a asak hpe mung nmai daw dan na ga ai. Manu dan ai apart hpe madu da ai anhte ni yawng manu dan ai prat hku nna nga sa ai rai yang anhte yawng hpe hpan da ai hpan Madu gaw grai myit pyaw na teng sha rai nga ai. “Rawt jat bawng ring manu dan ai prat hpe yawng madu lu u-ga”.
Wa Jau Joseph Ja Yaw
No comments:
Post a Comment