HKUM HKRITNGA MU

“Non Abbiate Paura”

Labau kadun Wasarabyin John Paul II gaw 18 May 1920 Wadowyce ngu ai myu, Poland mung dan hta shangai wa sai rai. 1 November 1945 hta jau aya hkam la nna 16 October 1978 hta John Paul II ngu ai mying hte 264 lang ngu na Catholic naw ku hpung a myi hte mu lu ai ningbaw, Sarabyin tai wa sai rai. Shi a mying majing gaw Karol Wogtyla ngu ai rai nga ai. 27 ning tup Sarabyin magam gun hpai nna mundan shara shagu de sadu gawan let hpung masha ni a makam masham hpe shangang ya lai wa sai rai.

Lak lai mu magam ni

Simsa lam hte rap ra lam, (peace and justice) hte seng nna mung shagrit shanem ai hte seng nna mung, Maria hpe hkungga la ra ai lam hta mung, makam masham(religions) hpung shada da matut mahkai lam hta mung, Chyoi Pra Hkum Hkungga la ra ai lam hta mung, a kyu hpyi ai lam hta mung laklai ai hku katsi kaja madun lai wa sai rai. Mother Teresa Culculta gaw shi a manang kaja re hpe mu lu ai. Shi hpe sat na gram ai Mumah Ali ngu ai wa hpe mung mara raw ya sai. Shi nan htawng de sa du ai rai. Shing rai nna anhte tsaw ra ai Wa Sarabyin John Paul II gaw, 2 April 2005 ya shani shi a lit magam kaw nna ban sa yup pyaw wa sai rai. Shi si mat ai hte kalang ta SANPRA ai masha tang na lam hpung masha shawa ni hpyi shawn wa sai rai.

Shi a n’gun jaw Manoi ga (motto )

Wa Sarabyin John Paul II a n’gup kaw na kapaw pru wa ai ga si ni rai nga ai; hkum hkrit tsang mu nga ai “non abbiate paura”. Hpa hpe n hkrit n tsang ra na rai ga ta.. Hkristu a chying hka ni hpe hpaw malang dat mu Hkristian ngu ai mying hpe hkam la na hpe n hkrit ra ai lam, Hkristu hpe hkap la na lam, Hkristu a hpang hkan na lam, Hkristu a kabu kara shiga gat hkai na lam ni hta gwi gwi hkawm sa wa ga ngu ai lam, teng man lam hta gwi gwi hkan sa na lam, Karai Kasang a mungdan gaw gap ai lam hte hkye hkrang la ai magam hta gwi gwi hkawm sa na lam, tsaw ra daw jau ai magamlam hta n hkrit ra ai ngu ai lam ni rai nga ai. Hkristu anhte a kraw kata de shang wa lu u ga chyinghka ni hpe hpaw malang dat mu. “Spalancate le porte a cristo”.

Shagrit shanem lam.

Servant of the servants of God ngu ai mying hpe hkam la ai wa rai nga ai. Hpa majaw ta, shi a ga hkaw ni hpe yu yu ga. Shi Sarabyin tai ai shani numbat 1 lang ngu na ga shaga hpang ai shaloi. “ngai italian ga nau n chye nngai shading sharai ya mi”. Kaja wa nga yang shi gaw Italian ga grai chye ai wa rai nga ai, rai tim shagrit shanem ai lam hpe madun ya nga ai.

Maria hte rosary.

Maria hpe hkung ga la ra kam hpa ai hte seng nna “totus tuus” mahkra na a (yawng hkra gaw na a matu) ngu ai ga si hte Maria hpe tsaw ra shing byi ai Wa Sarabyin rai nga ai. Rosary hti ai lam hta n’gun dat nna hpung masha ni hpe mung Rosary hti na lam a ja wa n’gun jaw lai wa sai rai.

A lu ai masha tang sai.

Shing rai Wa Sarabyin John Paul II hpe A lu ai masha, (blessed), (Beato) tang ai poi hpe 28 april 2011 kaw nna 2 may 2011 du hkra naw ku hpung a Ningpawt daju shara rai nga ai Vatican, San Petru a Nawku htingnu kaw galaw lai wa sai rai.

N dai poi hta mung kan shara shagu na nawku hpung masha ni, hpung masha nre kaga makam masham u hpung kaw na ningbaw ni hte shi hpe tsaw ra hkung ga ai shawa masha ni mau na ram ram law htam hkra sa du lawm ai hpe mu lu ai. Wan 2 hkawt (2 million ) re lam chye lu ai. Sarabyin a mung dan masha ni (poland) masha ni lak lai law du ai hpe mu lu ai. Roma myu ting gaw poi a shawng na bat 25 april shata kaw nna sumtsan manam ni hte hpring chyat mat taw nga sai. Lam shagu, jut shagu, hotel shagu, shara man ai pa layang shagu gaw masha hkrai hkrai rai nga taw sai.

Ngai mung sa kanawng nang

1 May 2011 shani hkying 10 kaw nna gaw Wa Sarabyin John Paul II hpe Alu ai masha tang ai Missa Hkungga hpawng hpe San Petru pa (square,or piazza) kaw galaw na rai yang dai jahpawt ngai mung, jahpawt 4 am hta yup rawt nna. Manang ni hte nta kaw na pru wa sai re. Ya anhte a kawlik gaw Vatican mung dan kata kaw rai nna. San Petru a nawku htingnu duna matu minute hkum 2 sha lagaw lam hkawm ra nga ai. Rai tim, dai jahpawt gaw masha nau law mat nna nta shawng kaw sha hkying hkum masum du hkra sa tsap yu tim, shawng de nsa hkaw mat nga ai. dai shara kaw sha nan nan rai nga ga ai. Shawng de sa wa mung nmai, hpang de gin htang wa mung nmai mat rai nga ai, tsam mari sha matep le wa nna nta de bai wa nna anhte a nta kawng kaw nna poi hpe yu ga ai rai.

Shing rai, Missa Hkungga hpe lahta e tsun ai hte maren 10 am hta hpang nna 1 pm hta ngut sai rai. Shi a sumla hpe mung Missa hpang ai hte Nawku Htingnu a man e sumpan grang hpaw dat ma ai. Missa ngut ai hte gaw shi a da-u hpe lup kaw nna shaw nhtawm Nawku Htingnu kata, San Petru a Nawku tawn shawng kaw e tawn da ma ai. Swiss hpyenla marai 4 mung ayan zawng nga ma ai. Shing rai sa dunna hkung ga jaw ai ni, karum kyu hpyi ai ni hti ndang hkra law htam ma ai rai.

Volonteer

Ngai hpa n chye n chyang ai, n gring ndan ai wa mung dai shangun ma wa a poi hta ap nawng daw jau ai magam hta shang lawm ni ai rai. Anhte myen mung ting na hpung masha ni yawng a malai hku nna ap nawng ni ai. Dai gaw lana mi hte lani mi rai nna n hkring hkra tsap nna bungli galaw ga ai. Hpa majaw nga yang masha grai nan law ai majaw rai nga ai.

Bai shi a da-u kaw mung nawku hpung a matu, kyu hpyi karum ra ai ni a matu, dum nta masha ni a matu, chyeju madu ni yawng a matu laklai kyuhpyi ni ai rai. Hpa majaw nga yang shi a karum shing tau ai lam hpe teng teng ngai kam sham ai rai.

Shing rai Wa Sarabyin John Paul II gaw Chyoi pra San Seng ai ni hte rau, Nu maria hte rau, anhte a kaji kawoi ni hte rau, Madu Karai Kasang hte rau htani htana ban sa ai hta e, Karai Kasang hpe shakawn kungdawn ai ni hte rau sum sing lamu hta ning ngai nga sai rai.

Hkawp hkungga gring ai ni e dai ni mung kan ga gaw galai shai wa ding yang rai nga ai, rai tim htani htana hte seng ai; ding yang ngang gring ai ni mung nga nga ai law. Kam sham lam, tsaw ra lam, myit mada lam ni gaw dai ni anhte Hkristian ngu ai kri dung rai nga mali ai law. Dai ni htani htana hte seng ai chyeju ni hpe anhte hkam la lu saga ai zawn anhte a htingbu wa hpe mung maji ai lam nnga ai sha garan jaw, sak se hkam nna dinghta lai sa manam hkrun lam hta arau sha sak hkrum hkawm sa wa ga ngu ga saw dat lu nngai law.

Seng Shatapru, Rome