“Yu u, Madu a mayam jan, ngai rai nga nngai; Na a ga hte maren ngai hta e, rai wa u ga.” (Luka 1:3)
August shata 15 ya gaw Nu Mariahpe Sumsing Lamu de woi shalun la ai poi rai nga ai. Kahtawlik Mungdan nre ai mungdan ni law law hta ndai poi hpe August shata 15 ya shani hta nan n galaw ai sha, ni htum ai Laban nhtoi de htawt nna, nawku hpung masha ni law law, Karai Kasang hpe nawku shakawn ai lam galaw ai. Nu Maria hpe mung hkungga, kamhpa let akyu hpyi ai lam galaw ga ai. Shi hpe nawku ai lam n re.
Lamu Kasa Gabriela tsun shana ai hta, Maria gaw, chyeju hte hpring ai, num mahkra hta hpung kaba grau ai, Karai Kasang a man e a lu ai num jan rai nga ai.
Nu Maria hpe hkungga shagrau ai hta, shi hpe lamu de woi shalun la ai ndai poi gaw grau ahkyak ai poi nan rai nga ai. Shi mara n kap ai, chyeju hte hpring nga ai num jan re majaw, shi si ai hpang shi a hkum tsawp hten yat mat ai lam n nga ai sha, lamu de woi shalun la sai lam hpe moi kasa ni a prat kaw nna, kam sham lai wa masai. Dai majaw, ndai shata hta, shi hpe tsaw ra kam hpa ai anhte shi a kashu kasha ni gaw, shi a kasi hpe myit sumru let hkan lang shatup sa wa na matu ahkyak la nga ai.
Maria gaw, shi na-um na-sin rai wa nna, shadang sha shangai na lam hpe Lamu Kasa Gabriela azin ayang tsun dan ai hpang, shi n chye na ai raitimung, hpang jahtum e, lamu kasa hte dang rang hkat ai lam n galaw ai sha, Karai Kasang a myit ra ai lam shi hta e byin wa u ga, dik wa u ga, nga nna tsun let, jet ai myit masin hte yin la sai. Ndai gaw, Karai a Kasha Yesu shinggyim masha tai wa na matu ahkang jaw ya ai, hkalum la ai hte garum la ai lam rai nga ai. Karai kasang gaw mahkra dang chye ai wa raitimung, shinggyim masha ni kam sham, tsaw ra myit hte Shi hpe garum shingtau na matu ra sharawng nga ai sha n-ga, kaja nan mung garum hpyi nga ai. Shi a tsaw ra matsan dum ai hte hkye hkrang la ai amu hta, anhte hpe Shi a lagaw lata shata shatai mayu nga ai.
Nu Maria gaw, dinghku pyi garai n de yang, na-um na-sin byin wa nna, shadang sha shangai na re nga ai hpe na lu ai shaloi, shi dik hkra mau ai hte myit yak na re.
Shi a kajan, Elizabeth mung dinghku de ai shaning law law rai wa timung, kasha n lu ai majaw masha ni shi hpe maudung num nga nna jahpoi asawng tsun ai hkam sha sai. Shi pyi ma hkum rai wa ai shata kru du wa sai lam hpe lamu kasa Maria hpe tsun shana ai. Shaloi, shi gaw, “ Yu u, madu a mayam jan, ngai rai nga nngai; Na a ga hte maren, ngai hta e rai wa u ga,”
( Lk. 1.3) nga nna, shi yin la sai; shi a kam sham myit hpe tsun shpraw sai; karai Wa myit ra ai hpe shi hkap la sai.
Elizabeth a lam na la ai majaw shi kabu myit pyaw ai lam nga na re. Elizabeth asak kaba sai ten hta she na-um na-sin byin nna, shangai na nhtoi ni wa ai majaw, shi a matu Maria grai myit ru tsam pu ya ai lam mung nga na re. Dai majaw, Maria gaw, Elizabeth hte rau sa kabu lawm na, shi hte rau Karai Kasang hpe chyeju dum shakawn na, shi hpe nta bungli bungsi lam hta garum ya na matu, Elizabeth nga ai tsan ai mare buga de du hkra sa wa sai. Dai gaw, Karai Kasang hpe tsaw ra kam sham ai lam hpe ta tut magam bungli hte shi sakse hkam madun ai. Dai shara kaw shata masum daram nga nna, shi a bu ga de bai wa mat ai. Ngu mayu ai lam gaw, Nu Maria gaw Elizabeth Yawhan Baptista hpe shangai shaprat ngut ai ten du hkra shi hpe ra ai lam shagu hta garum ya na sai lam hpe myit la mai nga ai.
Anhte mung, shani shagu sak hkrung sa wa ai aten hta makying jinghku, manaw manang, htingbu htingbyen ni hte hku hkau ai, garum shingtau hkat let nga sa wa ra ai. Maigan buga hta nga hkawm ai aten hta mung, grau nna pyi shada yu rem hkat ra ai, madi shadaw, garum shingtau hkat ra ai. N-gun jaw, shalan hkat ra nga ai. Anhte nu Maria kaw ya sha ya sha kamhpa akyu hpyi ai zawn, shi a kasi hpe myit sumru akyu hpyi let hkan lang shakut sa wa ga. Anhte n myit mada ai, n chye na ai, mabyin masa ni, yak hkak lam ni hte hkrum hkra wa ai shaloi, Karai Kasang hpe ja ja kam sham let, akyu hpyi ap nawng ga; shalan shabran ai hpe hpyi la ga.
+Philip Lasap Za Hawng
Bishop of Lashio
No comments:
Post a Comment