Hkristu hta tsawra la ai, sumtsan mung ga de lam amyu myu a majaw du hkawm nga ai manaw manang ni hpe ngai ndai laika gadun hte sha mi shakram mayu ai. (Kau mi gaw ngai hpe chye na re. Malawng maga gaw ngai hpe nchye na nhten.) Nanhte dai Malaysia kaw du nga ai jinghpaw Catholic ramma, hpung masha ni, ya na zawn shada matut mahkai let shakut shaja nga ai hpe na lu ai majaw, Ngai grai myit n-gun lu nna kabu ai. Matut nna myit hkrum mang rum let galaw shakut sa wa mu ngu nna aja awa tsun mayu ai.
Ya na zawn myit mang langai sha hte nga sa hkawm sa lu na matu anhte a tinggyeng myit hpe sha matut manoi nga yang gaw awng dang na, mai byin wa na gaw yak na re. Shinggyim masha kadai mung hkumtsup ai ngu ai n-nga ai. Anhte yawng shakut shaja sa ai rai yang n mai byin ai lam nga na nre. Raitim anhte a n-gun atsam hpe sha kam nna galaw nga ai rai yang, awng dang wa na nre. Awng dang wa lu na matu makam ma sham nga ra ai. Dai gaw, “Madu Yesu hta kam sham nga ra ai lam re.” “Ngai a mung ga hta maju jung nga ai rai yang, ngai nanhte hte rau nga nga na” nga nna Yesu nan ga sadi jaw da sai. Anhte myit hkrum mang rum rai hkawm sa lu na gaw anhte shada da tsaw ra myit madun hkat nga yang sha mai byin ai rai nga ai. “ kadai mung ndai hta grau ai tsawra myit n-nga ai: ting nang a asak hpe manang wa a matu sak jaw na… (Yh 15:13) (no one can have greater love than to lay down his life for his friends). Anhte gadai mung, Madu Yesu hta lai nna, ndai hpring tsup ai tsawra myit lu na matu gaw yak la ai. Raitim anhte ndai hpe sha pyi chye madat la ai rai yang grai ram la sai re.
Sumtsan mungga de sa hkawm ai ngu ai hpe ngai hkum nan du ga, sa ga ai majaw, mayak mahkak lam ni, myit garen gari ai lam ni nga ai hpe chye hkam sha lu ai. Ngai hte Naw San, an-yen 2002 ning hta jau tai dakkasu, Theology, hpe lung matut la na matu Italy de du sa wa ga ai. Ga nchye ai a majaw shawng shaning 2/3 ning gaw chyip chyap nga kau ai. Nta de bai nhtang wa mat na matu, gade lang myit kau ai pyi nchye kau sai. Raitim ngai lata la ai lam nre ai sha, ndai lam hta hkawm sa na matu shaga la hkrum ai lam re ai majaw mayak mahkak lam ni hpe tawt lai lu wa sai rai nga ai.
3 ning Rome kaw nga ai hpang, Milan maga de bai jawng htawt lung wa ga ai. Dai shaloi, Italy ga loi mi chye tsun chye shaga wa sai majaw, manaw manang ni law law chye kau la ai. 2008 ning ging htawng ta hta Jau ningbaw nna ramma ni(asak 13 – 17, marai 73) camping sa ai shaloi, ngai mung jau hpe garum na matu hkan sa mat ai. Salang nkau mi mung lawm ai. Lana mi salang langai mi hte ga shaga hkrup ai shaloi, ngai shi hpe tsun ai gaw, “Yu u, nanhte shan hpraw ni a lapran, grai tsan ai kaw nna (Asia), ga nbung, amyu nbung, n sam nbung ai raitim ngai nanhte hte ya na zawn lu hkrum shaga lu ai. Nanhte mung ngai hpe gran ging-hka nna matut mahkai ai lam n-nga ai. Ya na zawn lu hkrum shaga lu ai gaw “Madu Yesu a mying hta rai nga ai.” Ngai dum ai langai mi gaw: dai salang (Angelo) ngai hpe myi prwi si hkrat le tsun ai: “Re! Madu Yesu a tsawra myit hta anhte ni yawng kahpu kanau ni rai nga ai.”
Madu Yesu shi a sape ni hpe ga htet da ai gaw, shi a tsawra myit hta manoi manat nga ai hte shada da tsawra na lam rai nga ai. Anhte shada da myit hkrum mang rum let tsawra nga lu na gaw Madu Yesu hta sha nrai yang nmai byin ai lam rai nga ai. Lama na anhte shada da tsawra myit hkrum nga ai rai yang, ganing re ai hpyen, mayak mahkak ni, anhte a gahkrin gumdin nga ai hpe(unity) garan ginghka lu na nre. “nanhte ngai hta manoi manat nga ai rai yang, ngai a mungga nanhte hte rau nga nga nna, nanhte hpyi ai lam ni yawng hkum tsup wa na marit dai”(Yh 15,7).
Ngai hku nna gaw, nanhte manaw manang ni hpe myit hkrum nga let shakut nga na hpe grai tsun mayu ai.
Fr. Augustine Tsumhpawng Zau Awng
Hong Kong
No comments:
Post a Comment