Wangam Ladaw hpe Lusha gam Ladaw ngu nna mung tsun ga ai. Wangam shing nrai Lusha gam Ladaw hpe English ga hku "Lent" nga ai. Lent ngu ai gaw "springtime" ngu ai moi na English ga rai nna "Lap run ginhtawng ten" hpe ngu ai re. Grau nna Sinna Uropa mungdan ni hta Wangam ladaw nhtoi 40 ya "Ginhtawng lap run ten" ngu ai Wangam ladaw a lachyum hpe atsawm sha chye na nna manu shadan nga ma ai. Wanwu chya ai shani kaw nna hpun kawa ni malawng gaw hkraw mat ai zawn rai wa sai. Hpun kawa nkau mi gaw lap ni naw kap nga timung hkraw nyip mat nna n kau mi gaw lap run ai hte lakung lakying chyahkraw ni sha ngam mat ai. Raitimung dai hpun ni gaw si mat ai n re, kata kaw asak hkrung nga ma ai. Chyoi pra ai Laban bat du wa ai hte rau si hkraw mat sai zawn re ai lakung lakying ni gaw asak hkrung nga ai kumla ni hpe madun hpang ai. Hpun kawa nkau mi tsit lali ai lap hkalung nnan ni the lakung lakying ni kaga ni gaw ahtoi, ahpraw hte amaw nsam nampu nampan ni hte pu tsawm nga ai shaloi lamu na jan htoi du yang, na chying yu tsawm la nga ai nrai ni? Dai gaw ginhtawng lap run ten a hpang jahtum daw rai nga ai.
Kahtawlik Nawku Hpung hta Wanwu chya ai shani kaw nna Chyoi pra ai Laban bat shang ai shani du hkra nhtoi 40 ya hpe Wangam ladaw masat da ai. Wangam ladaw hta myit malai lu nna mara dan hkam ai. Mara hpe kau tawn da nna Karai Kasang hpang de kayin wa ai hte Hkristan makam masham sharin lam matsun ai wenyi sak hkrung lam hpe hkan sa ai lam rai nga ai (Yeremia 18:11, Yoela 2:12, Mahte 3:2). Wangam ladaw hta kam sham ai hpung masha ni yawng gaw tinang a n kaja ai ra marit lam ni hpe ndang nyet kau nna lusha gam let shan n sha ai, akyu hpyi shakut ai, alu jaw ai hte kaga mai kaja, tsawra matsan dum lama ai magam bungli ni galaw shakut ga ai.
Yaw shada ai lam ni
- Nat Satan hte Karai Kasang a lam woi matsun ai nsen hpe ginhka chye lu na matu
- Anhte hpe Karai Kasang shaga nga ai lam, anhte tinang a gawng kya ai lam hpe tinang hkum dai myit dum chye wa nna Karai Kasang a chyeju hte gram sharai la lu na matu
- Wangam ladaw hpe hkap tau la nna aten masat let Karai Kasang hte chyu sha rau nga na matu rai nga ai.
Mungkan ting ya na zawn sut lu nga mai lam htingnut hkrat yawm jam jau nga ai ten hta lusha gam ai, akyu hpyi shakut ai, mai kaja ai hte tsawra matsan garum ai magam bungli ni galaw shakut ai gaw htap htuk nna sut la ai wenyi sak hkrung lam rai nga ma li ai. Madu Yesu shi hkum nan nam mali zaibru jang de sa nna nhtoi 40 ya lusha gam let akyu hpyi ai a marang e Nat Satan hpe dang kau lu ai zawn (Mk 1:12-15) anhte mung ndai Lusha gam ladaw hta lusha gam, akyu hpyi ai hte mai kaja ai magam bungli ni hpe galaw let Nat Satan hte agung alau ni hpe dang kau nna du wa na Paska poi kaw Yesu hte rau mai kaja ai sak hkrung lam hta bai hkrung rawt wa lu na matu shakut hkan sa nga ga ngu Hkristu hta tsawra ai jinghku ni yawng hpe n gun jaw let saw shaga dat ngai law.
+ Saradaw Raymond Sumlut Gam
Manmaw Saradaw Ginwang
Manmaw
No comments:
Post a Comment