Myitkyina Sasana Sagurem, Wa Saradaw Francis Daw Tang kawn KCCM de n gun jaw shagun laika.
Hkristu Madu hta,
Tsawra ai KCCM magam gun ni, shang lawm shakut nga ai kashu kasha ramma ni yawng hpe Hpan Madu Karai Wa bausin makawp maga shaman ya nga u ga akyu hpyi shaman ya nga ai. Ya na zawn sumtsan buga du tim tinang a makam masham hte myusha lam yan hta rau tsap gahkyin gumdin nga lu na matu woi awn shakut ai, shang lawm shakut nga ai ni yawng hpe grai kabu n gun lu ai. Ndai gaw anhte makam masham nhtoi hpe lu la sai ni yawng mungkan ga a jum hte nhtoi tai nna shara shagu makam masham nhtoi hte jum a namchyim hpe ta tut hkrang shapraw shadan shadawng sakse hkam ai lam kaba rai nga ai.
Nanhte shada myit hkrum myit ra gahkyin gumdin nga ai zawn, tinang a dai daw buga kaw na kanu kawa ni, makam masham ningbaw ningla ni, tinang du nga ai mungdan buga up hkang salang ni, nawku hpung wenyi kanu kawa ni yawng hte mung nawku hpung makam masham langai sha hta jawm nawku nga ai ni a lachyum dan dawng shangun ai, lam shagu hta kangka shakut madat mara hkan nang hkansa lam ni hta jawm shang lawm shakut na hpe grai myit mada ra sharawng n gun jaw mayu ai.
Maigan mungdan shara shagu du nga sai anhte Wunpawng myusha ni KCCM hte grau ni htep gahkyin gumdin wa lu hkra mung matut shakut na hpe kam ai.
Nanhte hpe hkan gawan ai wa Jau ni hpe mung shaning shagu anhte saradaw ni jawm jahkrum nna dat na hku jawm myit lajang nga ga ai. Anhte Myitkyina hkumra zuphpawng hta mung jau ni hpe tsun sang lang dan sai.
America, England, Germany, Japan, Singapore hte Thai mungdan shara shagu hkan du nga ai ni ya na zawn jawm lu hpaw gahkyin gumdin nga ai rai yang makam masham, kyang lailen, magam bungli lam shagu hta manang ni e yu rip dang sha ai lam ni mahkra kaw na jawm shading sharai lu na rai nga ai.Sharawng awng ai myit hte ahkum ara shang lawm ga ngu yawng hpe n gun jaw dat nngai.
Yawng hpe Karai Wa tut nawng bausin makawp maga shaman ya nga u ga!
Hkristu Madu hta,
Bishop Francis Daw Tang
Myitkyina
No comments:
Post a Comment