BUGA NA MANANG WA A SHAGUN LAIKA

Maigan myu ni hpe sha yu kaba ai tsaw ra ai manang jan Hkawn Tsawm hpang de Buga na manang wa a shagun laika,

Tsaw ra hku hkau dik ai manang jan Hkawn Tawm hpang de n dai laika hte hkrum shaga dat lu n ngai. Hkawn Tsawm ngwi pyaw hkam kaja nga na kam ai. Mut Tsawm hte buga na a manang ni yawng mung hkam kaja let sha seng ang ai magam bungli ni hpe galaw shakut nga ga ai.

Hkawn Tsawm e, Nang buga hte anhte manang ni hpe shakram kau da na pru hkawm mat wa ai aten n htoi ni ram ram na mat wa sai i. Buga na anhte manang ni gaw nang hpe galoi ma adum nga ga ai re. Anhte manang ni hkrum zup shagu Na a lam hpe galoi mung jahta hkrup ga ai. Na a asak kaba sai gumgai dingla ni hpe tsaw ra hkungga chye ai lam ni, Ramma manaw manang ni hpe garum shingtau chye ai lam ni, Ma kaji ni hpe lam matsun madun sharin shaga chye ai lam ni, Na a myit galu ai hte mara chye raw ya ai lam ni hpe galoi mung jahta hkrup ga ai. Bai nna Na a maigan myu sha ni hpe she yu kaba ai myit ni hpe mung jahta hkrup hkrup rai ga ai. Nang hpe dum shagu Na a lam ni hpe sha jawm tsun jahta hta rai na nga ga ai.

Hkawn Tsawm e, Na a myit mada yaw shada ai hte maren Wun Pawng Buga hpe shakram kau da nna Nang pru hkawm mat wa ai tsawm ra ning rai mat wa sai. Nang Malaysia ga de nnan du ai shaloi, anhte manang ni hpe Malaysia ga na pyaw ai lam, yak hkak jam jau ai lam ni Na a shagun laika hte tsun dan ai le. Malaysia ga na nta ni lamu de madi ai ni hkrai re, Ma-un hpun ni mung nta kata hkan she hkai shatut ai lam, Wan leng ni mung lamu gan hkau hku she lagat hkawm ai lam ni le. Nang tsun dai (ka dan) ai lam ni hpe na chye lu nna anhte manaw manang ni n mu ga, n du ga ai mi rai tim n gup she mahka hkra hkra rai mau mat ma ga ai. Hkawn Tsawm nang tsun dan dan re ai majaw anhtebuga na manang ni mung chye jat la ai lam ni grai law saga ai re.

Tim dai ni gaw, Hkawn Tsawm a shagun laika nlu la, n mu hti ai aten ladaw ni grai na mat wa sai. Buga de Nang matut mahkai n galaw ai grai na mat wa sai. Na a lam grai na chye mayu rai tim, na chye mayu ai hta lai nna ga ning n chye di ga ai. Nang hpe matut mahkai la na mung Nang chye ai the maren anhte kaw n gun atsam n nga ai. Anhte manang shada san hkat ai hta lai nna gaw hpa ma n chye galaw ga ai. Anhte manaw manang ni sha na a lam hpe na chye mayu ai n re, buga na gumgai ding la ni, ma kaji ni mung Na a lam hpe na chye mayu nga ma ai re. Buga masha ni yawng nang hpe myit dum nga ma ai re. Tim nang gaw yawng hpe a zim sha nga tawn kau da ai le.

N dai zawn Na a lam na chye mayu nga ai ten hta a gajawng sha Na a shiga hpe na chye lu dat ai. Na a shiga na chye lu nna, n chye tsun dan hkra kabu mat ga ai..., tim Na a lam hpe bai matut chye lu ai majaw anhte a kabu ai lam ni yawng hkoi mat ga ai. Myit n pyaw hkam sha ai lam ni mung byin wa ga ai. Dai gaw Hkawn Tsawm nang wa Wun Pawng Shadang ni hpe shing du tawn kau da nna maigan la ni hte she nga pyaw hkawm , ganawn hkawm mat sai nga lam re. Anhte manaw manang ni Na a maigan myu sha ni hpe yu kaba ai lam hpe chye ai rai tim, Nang Malaysia ga de du yang Na a myit ni galai shai wa na hpe myit mada ga ai re. Rai tim, Na a maigan myu sha ni hpe yu kaba ai myit ni galai shai ai lam n nga ai hpe dai ni she chye lu ga ai. Hkawn Tsawm e, Na a maigan myu sha ni hpe yu kaba ai myit hpe n ra na Nang hpe galoi ma Mut Tsawm tsun shadum dum re ga langai nga ai le, malap kau sai kun? “Ngai Wun Pawng Shayi langai maigan la hpe la kau yang, Ngai na majaw Wun Pawng Shadang langai jan mat na ra ai” ngu ai le.

Hkawn Tsawm e, maigan myu ni hpe hkum yu kaba ngu n tsun mayu ai, maigan myu ni hpe yu kaba ai ngu ai hta shanhte a rawt ja galu kaba ai lam, shanhte a kun hpan ai hpaji lam, zet let ai myit masa lam ni hpe gaw yu kaba nna hpaji la ra ai, hpaji la nna shakut shaja ra ai le. Tinang a myu sha ni kaji kadun nga ai hpe dum ra ai. Tinang myu sha ni a matu shakut shaja ra ai. Maigan myu sha ni zawn anhte myu sha ni mung rawt jat galu kaba ra ai ngu myit nna shakut ra ai le. Hkawn Tsawm e, Na a myu sha, Na a htunghkring, Na Wun Pawng Buga hpe malap kau da sa na i? gabai kau na sa na ni? Hkawn Tsawm e, Nang lu da, madu da ai Htunghkring, Wun Pawng Mungdan ram tsam htap ai, manu da ai gara kaw naw nga ai kun myit yu u. Wun Pawng Shadang ni hpe yu kaji nna rai kun? Wun Pawng Shadang ni mung maigan wa a lahkam hpe hkan dep ai ni law law nga ai le. Atsam rawng ai marai rawng ai Wun Pawng Shadang law law wa nga ai ngu hpe gaw hkum malap kau yaw.

Hkawn Tsawm e, Nang gan myit shut kau ai majaw mung rai yang rai na re, hpang n hkrat shi ai. Aten naw nga yang Na a myit ni hpe lawan bai sharai la u. Na a maigan myu sha ni hpe yu kaba ai kyang hpe mung tawn kau da sa nu. Wun Pawng Shadang ni hpe lata gin dun na Wun Pawng Myu Sha ni myi hpaw na na wa hkra, Wun Pawng Mungdan rawt jat kalu gaba wa hkra shakut sa wa u. Dai ni na nhtoi hta Wun Pawng Myu Sha ni hte Wun Pawng Mungdan lawt lu na lam grai ra ahkyak taw nga sai. N dai zawn lawt lu na lam hta Hkawn Tsawm a shara kaw gadai wa malai shang gun hpai ya na. Yawng gaw tinang a lit tinang gun hpai taw nga ma ai re. Hkawn Tsawm e, Wun Pawng Myu Sha ni hte Wun Pawng Mungdan Nang hpe la nga ai.

Wun Pawng Myu Sha ni hte Wun Pawng Mungdan a matu bai wa na hpe myit mada ala nga let,

Tsaw ra ai manang wa,

Mut Tsawm