KCCM HPUNG MASHA NI HPANG DE

MALAYSIA DU JINGHPAW WUNPAWNG HPUNG MASHA NI YAWNG HPANG DE
Tsaw ra ai Malaysia kaw du nga ai Nuwa, Hpunau Hpung masha ni yawng ngwi pyaw hkam kaja nga u ga shakram dat lu n ngai.

“U hpung hka yang Sharaw garawt ai”
Shaman chyeju hte hpring ai 2010 ning January praw 1 ya (Shaning N nan) shani Kachin Catholic Community in Malaysia (KCCM) hpe awng dang ai hte hpawng ninghtan da lu sa ga ai.

Malaysia mungdan hta anhte Wunpawng Kahtolik hpung masha ni ja gumhpraw tam, hpaji tam rai sa du shanu nga ai shaning ram ram mi law wa sai hpe mu mada ai. Tim anhte hpung masha ni hpe lam woi madun la na, zinlum la na, garum shingtau la na U-hpung U-hpawng dai ni du hkra n nga shi ai. N dai zawn tinang chye ai hku sa du shanu nga nna makam masham lam hta, sutgan tam, hpaji tam ai lam ni hta anhte a matu hkrat sum ai lam ni, ru yak jam jau ai lam ni, masha wa a lahkam hpe n dep wa ai lam ni hpe mu mada wa ai. Dai majaw n dai lam ni hpe jut shara maga mi kaw na garum shingtau sa wa lu na matu yaw shada let anhte a KCCM hpe hpaw ning htan ga ai re.

Malaysia kaw du nga ai Nuwa, Hpunau hpung masha ji n ban yawng anhte a KCCM hta shang lawm nna myit hkrum mang rum let lata gin dun hkawm sa wa ga ngu saw lajin mayu ga ai.

Anhte hpe woi awn la na, zinlum la na U-hpung U-hpawng n nga ai majaw myi man kaji ai lam ni, hkrat sum ai lam ni, yu kaji ai lam ni hkrum sha lai wa sa ga ai. N dai zawn re lam ni matut nna n byin pru wa na matu anhte a KCCM kaw na Nuwa hpunau hpung masha ni hpe woi awn sa wa na ga ai, ra a hkyak wa ai ten shawng kaw tsap ya lu na matu yaw shada ga ai. Malaysia mungdan ting chyam bra nga ai anhte hpung masha ni yawng makam masham lam hta grau grau shakut shaja sa wa lu na matu, shada myit mang langai sha tai wa lu na matu, shada pu gang yang sin machyi chye na matu KCCM kaw na woi awn sa wa ai hta lahkrip ra ra shang lawm nang na hpe lajin mayu ga ai.

KCCM grau rawt jat galu kaba wa nna Nawku hpung hte ra gadawn nga ai hpung masha ni hpe grau grau garum shing tau la lu na matu yawng hkra shanglawm shakut sa wa nga ga.

Sharaw garawt n hkrum na matu u hpung n hka ai sha myit hkrum mang rum, lata gin dun let jawm shakut sa wa ga ngu yawng hpe lajin dat lu n ngai.

Hkrsitu hta,

Shd. Paul Kaiji Naw Awng
Ningbaw Malai
KCCM

No comments: