Tinang a daidaw, Wunpawng Buga hte tsaw ra ai kanu, kawa, kahpu, kanau, makin jinghku hte tsan gang ai shara hkan hkawm sa nga ai hpu nau ni yawng hpang de:- Wa Karai anhte hte rau anga nga ai. Shi hta tut e kam hpa nga ga: "Ngai hpe karum na gaw, kanang na pru na a ta? Lamu hte aga hpe hpan tawn ai Karai Kasang kaw na ngai hpe karum na lam pru wa ai. Shi gaw na a lagaw hpe kashawt shangun na, n rai; Nang hpe bau sin ai wa gaw yup wa ai n rai. Karai Kasang gaw nang hpe bau sin ai wa rai nga ai; Karai Kasang na a hkra lata a shingnip rai nga ai. Ru tsang yawng hta na, nang hpe bau sin na ra ai; Na a myit masin hpe shi bau sin na ra ai. Shi gaw ya kaw nna prat dingsa e, na a pru wa ai hte shang wa ai lam bau sin ya na ra ai." (Shakawn Kungdawn 121)
- Du hkawm sa mat wa ai shara shagu hta Madu Yesu a Tara Lam ni hpe sakse hkam ga: "Yu mu, chyahkyawn ni a kaang de sagu hpe zawn, ngai nanhte hpe shangun dat made ai: dai rai nna nanhte gaw, lapu zawn myit shingdi nga mu. Rai timung, masha ni hpe sadi nga mu..." (Mt 10:16-17)
- Madu a chyeju shingnip a npu e, galu kaba, awng dang, law htam sut su wa mu ga: "Isaraela a kashu kasha ni chyawm gaw mayat maya wa nna, tsanawn nga ma ai hte law htam wa let ja ja kaba wa nga ma ai: dai mung ting hkan e shanhte hpring nga ma ai." (Ninghpawt Ninghpawng 1:7)
- Dai chyeju lu na matu shada myit hkrum myit ra garum shingtau pawn ba hkat nga ga: "Dai kam sham ai shawa hpung ting gaw myit mang langai sha rai nga ma ai: kadai mung tinang lu ai arai hpe nye a, n nga ai sha, yawng mayawng hpe jawm lang ma ai." (Kasa 4:32)
Rev. Dr. Joseph Yung Wa
Chancellor
Myitkyina Diocese
Myanmar
No comments:
Post a Comment