KCCM GINRA NTA DINGSHAWN POI

2013 ning May praw (5) Laban shani Malaysia mungdan du Jinghpaw Wunpawng Kahtolik hpung masha ni kawn Karai Kasang a shaman chyeju jaw e hkam la lu sai, Ginra Nta Nnan hpe Karai Kasang kaw ap ya ai Ginra Nta Dingshawn shang akyu hpyi lamang hpe awng dang ai hte galaw la lu sai. Ginra nta Dingshawn shang ai lamang hpe shani hkying (1:30PM) ten ram hta galaw lai wa sai hte Sara Francis Kham hte Sara Paul Kaiji Naw Naw ni kawn akyu hpyi woi awn let Ginra Nta hpe Karai Kasang kaw ap ya lai wa sai. KCCM ningbaw Slg. James Gyidu La Hkawm kawn Ginra Nta a lam hte Ginra Nta hta galaw sa wa na mahkyen lam hpe tsun sanglang dan mat wa nna, KCCM Amu Madu Slg. Patrick Lahtem Yaw Htoi kawn mung Setapak, Good Shepherd Jau Ginwang de na du sa ai mungdan masha hpung masha ni chye na na matu English ga hte gahtap tsun sang lang lai mat wa sai. 

Ginra Nta a yaw shada ai lam ni gaw,

1. Mani hpe makam masham lam ni hpe sharin ya lu na matu,

2. Mani hpe Jinghpaw Laili Laika hte machye machyang ni sharin ya lu na matu,

3. English laika hte Computer hpaji ni hpe sharin ya lu na matu,

4. Laban Misa Hkungga n lu sa lawm ai KCCM Hpung masha ni hpe Laban nawku lamang ni woi galaw sa wa lu na matu,

5. KCCM Hpung masha hpe ra wa ai hta hkan nna garum shingtau sa wa lu na matu,

akyu hpyi lamang ngut ai hpang malu masha ni hpe jawm sha let KCCM Ginra nta dingshawn poi hpe awng dang ai hte galaw la lu sai lam shana dat ga ai.