NA A MATU HKRISTU MADU SHANGAI WA SAI

Ngwipyaw simsa ai Hkrismat hte Shaning nnan rai u ga yawng hpe shakram akyu hpyi ya dat nngai law.

Shaning shagu anhte ni yawng kabu gara myit ngwi myit pyaw ai hte Hkrismat poi hpe galaw lu nga ga ai gaw Madu Karai Wa a laklai dik ai chyeju kaba langai mi nrai nga a hka.

Dai Hkrismat Poi gaw lai sai shaning 2010 hta e anhte ni langai hte langai hpe shuthpyit mara a mayam prat kaw nna hkye mawoi la na matu Karai a Kasha Yesu Hkristu gaw Nu Maria a hkritung hta shinggyim hkum hkrang sa la nhtawm, Betlehem mare, dumsu nga lawng hta shangai chyinghkai wa ai lam hpe myit dum galaw ai labau shang masat poi kaba langai rai nga ai.

Dai Karai a Kasha, masha tai wa let anhte hte rau sa nga lu ai mung Madu Karai Kasang gaw anhte hpe gade tsawra, matsan dum ai hpe madun dan na matu rai sai.

Karai a Kasha Yesu Hkristu gaw npawt shuthpyit mara n kap ai Nu Maria kaw nna shangai wa sai. Anhte shut hpyit mara lu ai ni a prat kata de shangai shang wa sai rai nga ai.

Dai majaw Ma Yesu shangai wa ai gaw, Mara n kap ai Wa kaw nna shangai chyinghkai wa nhtawm, shuthpyit mara lu ai wa a matu shangai shaprat wa sai rai. (Lk. 2:7)

Dai Madu Yesu a shangai chyinghkai wa ai gaw Betlehem na dumsu nga lawng hte sha ngut mat sai nre. Dai ahkying aten kaw nan Yawsep,Sagu rem ni hte sinpraw mung na hpaji rawng ai ni a prat kata de mung shangai chyinghkai wa sai hpe mu lu nga ga ai.

Dai hte maren, anhte ni hkum ngau shagu a prat hta mung dai Madu Yesu gaw shangai chyinghkai wa dingyang rai nga ai.

Ja Chyum Mungga na Shi a prat labau hpe yu ga nga yang;

1. Dinghku de sha ai ni, dinghku kata de shangai wa ai lam hpe mu lu ai. Hkanan hkungran poi hta sa du dung lawm nhtawm ra wa ai lam ni hpe garum ntum jaw ya lai wa sai (Jn. 2:1-11)
2. Amu bungli galaw sha ai ni a prat hta shangai chyinghkai wa let lam matsun garum shingtau ya nga ai. (a) Laksama bungli galaw sha ai Kawa Yawsep hte rau nga kaba wa let, Kawa hpe garum lai wa sai re. (Mt. 1:25) (b) Nga hkwi sha hkawm ai Kasa Petru hte manang ni a hpang nga hkwi lawm let shangai wa sai. (Lk. 5:4-7) (c) Nbung laru ja ai nammukdara hka hta hkawm sa nga ai ni hpang du sa let hkye mawai la sai (Jn. 16-20). (d) Matha yan Mary hkan nau zawn nta bungli galaw ai ni a hpang sa du gawan n gun jaw ya nga ai. (Lk. 10:38-42)
3. Shawng lam matu nmu, myit yawn myit kaji, bu hkawm sa nga ai ni hpang Emau de hkawm sa nga ai kasa lahkawng hpe n gun jaw ai zawn, du sa let n gun jaw lam woi madun ya nga ai (Lk. 24:15-31)
4. Nat kap ai hte ana zinli lam amyu myu majaw machyi makaw hkrum nga ai ni hpang shangai chyinghkai wa let, ana ahkya amyu myu hta na shamai shatsai ya, hkye la ai hpe mu lu ga ai. (Jn. 5:3), (Mt. 8:1-17)
5. Mara lu nna jeyang hkrum ai ni hpe tsawra matsan dum ai hte garum la, mara raw ya lam madun ya nga ai. (Lk. 19:1-11)
6. Mara lu ai wa raitim Shi Madu hpe tsawra, kam sham ai ni a prat hta shang wa nhtawm, shut mara raw ya ai hte hkyehkrang la ai chyeju jaw ya nga ai. ( Jn.12:1-8)
7. Kam sham nna si mat sai hpe pyi dai Madu Yesu gaw du sa wa nhtawm, bai jahkrung sharawt ya let asak nnan bai jaw ya nga ai re. (Mt. 9:18-26), (Jn.11:38-44)

Dai majaw, Shangai wa ai Hkristu Madu hta tsawra hkungga ai nu wa hpunau ni, Dai Ma Yesu hpe kam sham tsawra manoi manat nga ga. Anhte ni yawng gara ga, kaning re prat hkrun lam hta rai nga ga tim dai Madu gaw ndai Hkrismat nhtoi hta sha n ka anhte a prat kata de shani shagu shangai chyinghkai wa lu na matu shara tam nga ai hpe dum shai nga ga law. Na a prat hta Ma Yesu shangai wa lu u ga.

Jau Joseph Jangmaw La Din

Lashio