KANU KAWA POI HTA...?????

Kanu Kawa Poi du yang Bum Ga de grai dum ai. Kanu Kawa Poi galaw ai a yaw shada lam hpaji jaw ai hpe hkap la let Kahtawng shagu ngu na daram shaning shagu Kanu Kawa Poi galaw wa ai.

De a majaw akyu chyeju law law hkam la lu ai hta na,

Ramma ni, kashu kasha ni Kanu Kawa Poi hta Kanu Kawa, Sara Saranum ni, hkungga ang ai ni hpe kum hpaw kum hpa jaw na yaw shada ai lam nga wa ai.

Poi galaw na lamang hte seng nna tau nau jawm bawng ban ai a majaw shada myit hkrum ai lam lu la ai, kaja ai lam hpe jawm bawng ban ai a majaw n-shawp ai lai len ni koi yen wa lu ai.

Kanu Kawa a chyeju hpe grau sum ru wa let, Nu yan Wa hpe shut lai wa ai mara ni hpe hpyi nem mayu wa ai, hpang de n-shut sana ngu ai ga sadi, Nu yan Wa hpe grau tsaw ra na ngu ai myit hte Nu yan Wa hpe chyeju htang lu hkra shakut na ngu ai myit a n’gun atsam ni lu la wa ai.

Kanu Kawa hte Kanu Kawa a shara kaw nga ai ni mung Ma ni a shakut ai lam, chyeju htang ai lam ni hpe mu mada nna Myit hta grai sim sa ai. Kashu Kasha ni a mara hpe raw ya lu ai sha n-ga, Kanu Kawa Poi a lak lai ai Chyeju hte Ma ni hpe shaman ya lu ai.

Lam shai nga ai kanu n’kau mi Kanu Kawa Poi hta shang lawm lu ai a majaw tinang shangai shaprat da ai kasha ni hpe n-ga, hkri tung na ma hpe makawp maga let gwi gwi rip rip rai Karai Wa hpan tawn da ai tsawm htap la ai mungkan a n’htoi hte shachyen ya atsam bai lu la ai.

N’dai ni gaw Kanu Kawa Poi a majaw lu la ai Laklai Shaman Chyeju ni hta na kau chyen mi rai nga ai.

Kalang mi, kahtawng kaji langai mi de Kanu Kawa Poi Missa nawng na matu sa du ai. Hpung masha ni sha n-ga, shang lawm ai kahtawng masha ni law la ai.

Missa nawng ngut ai hpang Kanu kawa ni hte asak kaba ai ni hpe shagrau ai lamang galaw ga ai. Lamang woi awn ai num kasha lamang ni hpe hti mat wa ai, langai hpang langai kumhpa jaw mat wa ai. Lamang yawng ngut mat ai hpang, asak kaba ai kanu kawa yawng a lata hta ramma ni jaw ai kumhpa, kashu kasha ni jaw ai kumhpa kabu pyaw let hpai da nga tim, Salang langai a lata hta hpa mung n-hpai da ai. Mying shaga hkrum ai hta mung n-lawm ai. Dai hku sha dung nga ai. Shi ga hkum mi pyi n-shaga tim shi a myi hpe yu dat yang Wa Jau hkum nan grai yawn let hkrap mayu wa ai. Lamang shana ai num kasha a kawa rai nga ai. Dai num kasha kanu hpe gaw kumhpa jaw tim kawa hpe gaw n-jaw ai le. Poi ngut ai hte ramma ni daw ya ai malu masha n-sha ai sha dai salang wa azim sha wa mat sai. “Wa Jau, yi sa ra ai majaw ngai naw wa mat na yaw” da. Shi Wa Jau hta lai na kadai hpe mung n-shakram da sai.

Tsaw ra ai manaw manang ni, Ramma ni, Kanu Kawa ni, Dai salang wa gaw nang hkum nan rai yang, nang gara hku hkam sha na? Wa hpe nang n-ju ai nga tim shawa hpawng hta Wa hkam sha yak hkra matai htang gwi a ni?

Anhte kashu kasha n’kau mi Nu hpe , n’kau ni Wa hpe myit machyi chye nga ai.

N’dai laika hpe ngai lu ka ai gaw Nu a majaw sha mung n-re, Wa a majaw sha mung n-re. Shan lahkawng a tsaw ra myit a majaw she re. Dai zawn sha, ngai tsaw ra ai manang wa/jan, n’dai “Kanu Kawa Poi shagrau mungga” hpe nang hti lu ai gaw shangai shaprat ya ai Nu yan Wa a Shaman Chyeju nan re ai yaw.

Fr. Stephen Zaw Min Lat

Ram Shat Jawng Lit Hkam

Manmaw