Hkristu hta hkungga tsawra ai, Malaysia mung dan kaw e lam amyu myu a majaw du nga ai hpu nau wun pawng jinghku jingyu manaw manang ni yawng hpang de Italy mung dan kaw na ngai Jau Stephen N Hkai Tang Gun laika kadun mi hte ka shakram dat lu ga ai. Anhte ni gaw dai daw buga kaw nna lam amyu myu hte mai gan buga de du hkawm nga ai ten hta anhte shada da matut mahkai lu na a hkaw a hkang lu ai gaw Karai Kasang a chyeju nan rai sai, ya ngai na lu ai zawn nanhte Malaysia kaw du nga ai catholic ramma shayi shadang sha ni shada myithkrum myitra let garum shingtau nga ai lam grai na kabu ya ai. Anhte wun pawng myu sha ni mai gan de chyam hkawm nga ai grai na sai rai tim, n dai zawn myit hkrum hpawng hpang wa ai nanhte ni shawng nnan rai sai, dai hpe anhte ni yawng a rawng la nga ga ai, matut nna shakut shaja sa wa na hpe mung grai n gun jaw dat ga ai.
Moi ngai Myitkyina Columban Seminary kaw naw nga ai shaloi anhte a Study Room kaw ka da ai laika langai hpe bai myit lu ai, dai gaw “Why are you here”. N dai shadum laika gaw ngai hpe ya ten du hkra galoi mung garum n gun jaw nga ai, n dai Italy mung dan kaw ginwang up jau hku nna parish masum ting hpe yu nga ai re majaw, bungli law nna myit ba ai ten ni, grau nna ruk yak jam jau hkrum bu ga de marit ai ten ni, shing nrai ngai galaw hkawm sa wa ai lam ni shut shai mat ai ten ni hta n dai shadum laika ngai hpe bai lam madun garum ya nga ai. Dai ni ngai mung nanhte hpe n dai shadum laika shagun dat mayu ai. “Why are you here” nanhte ni hpa lam a majaw dai kaw du nga ai hpe atsawm sha myitdum la ga.
Nanhte a pandung hpa re ai hpe hkrak chye la ga. Mungkan hta e lam amyu myu ni anhte a myit mada yaw sa ai lam ni hpe sharai kau ya nga ai, pyaw hpa lam ni, malu masha lam ni, myit kaba mat lam ni hte kaga lam a myu myu ni anhte hpe lam woi sharai ya nga ai hpe galoi mung dum nga ga. Anhte wun pawng myu sha ni gaw anhte a buga, htung hking ni hpe n malap ai sha anhte ni du nga ai shara kaw kaja ai katsi ningli madun dan lu na grai a hkrat ai. Dai hta e anhte a mahkam masham lam hpe sakse hkam na mung lawm nga ai. Karai Kasang a chyeju a majaw anhte lu da ai n dai mahkam masham hpe n malap ga, grau nna mahkam masham galu kaba wa na hpe jawm shakut nga ga.
Nanhte a KCCM (Malaysia) hpung na Pangdun hta n dai zawn ka dai ai “Malaysia mung dan du Catholic Jinghpaw Wunpawng Myu Sha ni Makam masham hta ngang kang wa nna, myit hkrum gahkin gumdin let shada garum shingtau la lu na matu” nga da ai. Dai hte maren dai yaw shada da ai pandung du lu na gaw yawng a lit rai nga ga ai. Dai lit hpe magam gun ai ni chyu sha galaw yang gaw grai awng dan na nre, rai tim nanhte dai buga kaw du nga ai catholic hpung masha ramma ni yawng nan kabu gara let shang lawm ai rai yang Karai Kasang a shaman chyeju hte grau awng dang wa na hpe mu lu ai. Dai re majaw nang ngai n lata ai sha shada da myitkrum myitra let garum shingtau sa wa na hpe ngai n gun jaw dat ga ai. Nanhte a matu mung anhte wun pawng jau ni yawng shara shagu hta na galoi mung myit dum a kyu hpyi garum ya nga ai hpe dum nga mu. Nanhte a kanu kawa jinghku jingyu manw manang ni nanhte hpe grai myit mada nga ai zawn anhte wenyi kanu kawa ni rai ga ai Saradaw, jau, mama ni mung nanhte yawng a myit yaw shada ai lam ni awng dang galaw lu na hpe myit mada let n gun jaw nga ga ai. Dai re majaw ngai shagun dat ya ai shadum laika “Why are you here” hpe galoi mung myitdik let shakut sa wa na hpe shadum n gun jaw dat ai.
Ngai hpe n dai shadum n gun jaw laika ka na matu garum hpyi dat ai Kaji Naw Naw hte KCCM magam gun comittee ni yawng hpe mung chyeju dum dat ai. Dai Malaysia buga kaw du nga ai ngai na manang ni, jinghku jingyu ni yawng hpe mung bai shakram dat ga ai. Nanhte yawng hpe Wa Karai Kasang galoi mung tut nawng bau sin mahkawp maga shaman ya u ga.
Wa Jau Stephen N Hkai Tang Gun
Italy
No comments:
Post a Comment