Lang mi hta Karai Kasang a lam kalang mi mung nna ga ai, hpung masha nre ai jawngma langai hpe Shi Sarama gaw Madu Yesu nni nkri hkam ai lam,udang hta jen sat kau ai lam tsun dan ai shaloi ndai ma gaw “ Yesu hpe sat ai ni gaw grai nhkru ai ni she rai nga” nga nna tsun ai. Bai Madu Yesu si ai kaw nna bai hkrung rawt ai lam tsun dan ai shaloi “ Grai mau hpa she rai nga” nga nna tsun ai da.
Tsawra ai nu wa hpu nau ni, mi na ma gaw Madu Yesu hpe udang hta jen sat ai ni hpe “nhkru nkaja ai masha ni” nga nna tsun ai. Ndai zawn nhkru nkaja ai masha law law hpe nang mu yu na nhten. Nang hkum nan mung masha ni e, roi sha, dang sha ai hpe hkrum yu na nhten. Nkau mungdan hkan e, myusha kaba ni gaw myusha kaji ni hpe roi sha dang sha ai. Ndai zawn roi sha dang sha hkrum ai hpe nkam hkam ai majaw rawt malan wa ai. Kalang lang n’sharang jin na daram roi sha dang sha hkrum ai majaw maroi nni masin nsi timung gara hku nchye di ai. Dai roi sha hkrum ai kaw nna lawt lu na matu ladat amyu myu tam hpang wa ai. Ndai zawn maroi nni masin nsi rai taw nga ai masha ni shawng nna myit hpang ai shaloi/ mau hpa atsam rawng ai hkyela na wa hpe myit hpang ai. Masha hta grau laklai ai masha, Karai Kasang a atsam lu ai masha, nat hpara ni e atsam bang ya hkrum ai masha ni hpe myit hpang wa ai. Anhte superman Batman ni a sumla hkrung hpe mu yu na nhten. Ntara ai hku roi sha hkrum ai ni hpe hkyela na matu lamu de nna atsam bang ya hkrum ai masha ni a lam re. Shanhte gaw ntara, dang sha hkrum ai ni hpe hkyela ai.
Superman, batman sumla hkrung hta, nnan daw gaw nhkru nkaja masha ni kaja ai masha ni hpe roi sha dang sha ai lam madun ai shaloi myit hta njaw dum ai. Dai hte maren Madu Yesu hpe udang hta jen ai lam hpe na ai shaloi njaw dum ai ntara dum ai. Kaja wa nga yang Israela myusha ni hkum nan Roma myusha ni up hkang dang sha ai hpe hkrum lai wa sai. Nkau maroi nni masin nsi majaw rawt malan ai. Roma myusha ni a lata kaw na shalawt ya na masha, hkyela na masha hpe myit mada ala lai wa sai. Madu Yesu lamik kumla ni madun ai shaloi “ndai wa nan anhte hpe hkyela na wa rai sai” nga nna myit mada lai wa sai. Madu Yesu hpe Superman, Batman hpe zawn myit mada lai wa sai. Rai timung shanhte myit mada ai hte maren Madu Yesu nhkyela ai majaw shi hpe udang hta jen na matu ap kau ai. Ndai mabyin hpe yu dat ai shaloi, masha ni roi sha dang sha hkrum ai ni hkum nan kaga masha hpe mung roi sha dang sha ma ai ngu ai hpe shadum ya ai. Israela myusha ni gaw Roma myusha ni e roi sha hkrum ai. Dai hte maren shanhte mung Madu Yesu hpe bai roi sha ai.
Madu Yesu u-dang hta jen noi si hkam ai lam gaw, tara ai hpe ntara ai lam gaw dang mat wa ai, jaw ai lam hpe njaw ai lam dang mat wa ai, kaja ai hpe nkaja ai lam dang mat wa ai lam re. Dai hte maren dai ni na aten hta mung njaw ai masha ni, ntara ai masha ni she grau shagrau hkrum ai, shara kaja lu ai hpe anhte mu yu na re. Madu Yesu gaw shi, n’shut ai lam hpe shut ai zawn, mara nlu ai rai timung si dam mara lu ai zawn, u-dang hta jen sat kau hkrum ai. Pilatu tsun ai hta “Yu mu nanhte a man e, ngai shi hpe san yu we yang, nanhte shagun ai mara lam hpa mung ndai wa hta nmu we ai, dai majaw shi hpe anu sharin nna dat dat na we ai ngu ai shaloi shawa masha ni gaw “ udang hta jen da u jen da u, Baraba hpe mahtang dat ya myit” nga nna marawn ai. tengman ai, kaja ai Madu Yesu mahtang she nkaja ai zawn, nhkru nkaja ai Baraba mahtang she kaja ai zawn tai mat wa ai. Mara nlu ai wa, sungnung shing di ai Madu Yesu hpe kaja wa mara lu ai masha langai zawn, anu gayat ai, roi ai, jahpoi asawng ai, udang hta jen ai, shi si ai hpang lup makoi ai. Lama wa Madu Yesu a labau maumwi gaw ndai shara kaw jahtum ai rai yang, anhte yawng Madu Yesu hpe kaja wa nan mara lu ai wa, udang hta jen sat gyin ai wa hku mu mada hkap la na re. Ndai mau mwi gaw ntsawm ai labau maumwi rai na re. Rai timung Madu Yesu a labau maumwi gaw ndai kaw nhtum ai. Shi gaw hpung shing kang hte bai hkrungrawt wa ai. Shi hpe mara shagun da ai lam nteng ai lam hpe bai hkrung rawt ai lam a marang e,sakse hkam lai wa ai. Israela myusha ni myit mada ai hte maren, Superman, batman hta grau ai Hkyela Madu re.
Si hkrung si htan gaw Madu Yesu a matu labau hpang jahtum nrai shi ai. Grau ahkyak ai daw gaw jahtum e she re. Hpang jahtum daw gaw Madu Yesu si ai kaw nna hpungshing kang hte bai hkrung rawt ai lam re. Shi hpe mara shagun ai masha ni, shi hpe u-dang hta jen ai masha ni gaya hkrum ai. Shi bai hkrung rawt wa ai gaw masha yawng a matu re. Shi a hpyen ni a matu mung re. Hkristu bai hkrung rawt wa ai gaw shi hpang hkan ai masha ni hpe kabu shangun ai lam re.
Madu Yesu bai hkrung rawt wa ai lam gaw, tengman ai lam ngu ai gaw galoi mung nsi lu ai ngu ai a sakse re. Anhte tengman ai lam hpe ningdang mai ai, tengman ai lam hpe masu mai ai, mara shagun mai ai, je yang mai ai, zingri mai ai, sat kau mai ai, lup makoi kau mai ai, rai timung masum ya nhtoi hta Madu Yesu bai hkrungrawt wa ai zawn tengman ai lam gaw bai hkrungrawt na re. Tengman ai lam hpe jahkring jahka makoi magap da lu timung htani htana nmai makoi da lu ai. Anhte galoi mung dum ra ai lam gaw tengman ai lam hpe, myit daw myit hten nna galoi mung hkum kau da. Kaga masha ni kau da timung hkum kau da. Jaw ai lam, teng ai lam hpe galoi mung galaw ga. Tengman ai lam gaw galoi mung jaw ai. Lamu mung nna lahkawng masum ya jan npru ai majaw jan ngu ai nnga sai ngu ntsun lu ai. Lamu san wa ai shani jan gaw teng sha pru wa na re.
American shanhpraw ni gaw shanchyang rawt malan ningbaw Matin Luther King hpe sat kau yang rawt malan ai lam zim mat na re ngu sawn la ai. Rai timung Matin Luther king hpe sat kau ai hpang , grau she rawt malan ai lam sawng wa ai. Mungkan ting pyi jam bra mat wa ai. Mahatma Gandhi hpe sat ai ni gaw Gandhi a lata du ninghkap adawt ai lam n’galaw ai sha simsa ai ladat hte rawt malan ai lam hpe jahkring lu na re” ngu kam ai majaw sat ai. Rai timung shi si ai hpang grau she jat wa ai. Yuda makam masham ningbaw ni Madu Yesu hpe sat kau yang shi hkaw tsun ai lam zim mat na re nga nna myit la ai majaw udang jen sat ai. Tengman ai lam hpe makoi magap na shakut ai. Rai timung Madu Yesu gaw bai hkrung rawt sai. Dai majaw dai ni Madu Yesu si ai kaw nna bai hkrung raw tai Paska poi gaw anhte Hkristan ni a matu kaba dik ai awng hpadang poi re. Shi dai ni bai hkrung rawt sai. Allelua, Karai hpe shakawn ga.
Jau Peter Ah Hpung
Philippines
No comments:
Post a Comment