Kachin Catholic Community In Malaysia

WELCOME TO KCCM

Kachin Catholic Community in Malaysia Kawn Hkap Tau La Ga Ai

Anhte Jinghpaw Wunpawng Kahtolik u hpung u hpawng [KCCM] hpe 2010 ning January 1 (Shaning N-nan) shani, St. John Cathedral kaw kabu gara awng dang ai hte hpaw ning htan da lu saga ai.

Malaysia Mungdan kaw sa du Ja Gumhpraw tam, Hpaji tam nga ai Hpung masha ni yawng a makam masham lam,Htung Hkring lam,Hpaji lam, bawngring rawt jat lam ni hpe madung yaw shada let hpaw ninghtan da ga ai re. Malaysia mungdan hta hpung masha ni lani hte lani law htam jat wa nga ai rai tim, lam woi zinlum la na u hpung u hpawng n nga ai majaw, hpung masha ni dim bri dum bra rai nga ai hpe mu lu ai majaw KCCM hpe hpaw ninghtan sa wa ai rai ga ai.

Malaysia kaw du nga ai Nuwa Hpunau Hpung masha ji n ban yawng anhte a KCCM hte matut mahkai lata gindun let myit hkrum mang rum ai hte rau sha hkawm sa wa ga.

Bai nna, KCCM a Blog n dai hpe hpaw shada ai lam a yaw shada lam gaw, Malaysia kaw du nga ai Hpung masha ni hpe KCCM a shamu shamawt galaw sa wa ai lam ni, Nawku hpung shiga ni,Mungga hkaja ai lam ni hte hpaji lam ni hpe htawn tsun dan mayu ga ai majaw galaw da ai re. Myu Sha Ga hte Laika hpe manu shadan chye na matu mung yaw shada ga ai. Dai ni na n htoi hta anhte a Kashu Kasha ni Myu Sha ni a laika hpe sharin da nna hti chyai na, grau chye chyang hkra hka ja la na laika ni hpe nau n mu hti nga ma ai. Myu Sha ni a Ga hte Laika n mat na matu gaw dai ni na Kanau Ramma ni kaw grai lit nga ai hpe mu mada ai. N dai lam ni hte jut maga mi hku n na hkan shatup ya na hpe myit mada let KCCM a Blog http://www.kccmalaysia.blogspot.com n dai hpe galaw da ga ai re.

Anhte KCCM hpe hpaji jaw mayu ai lam ni nga yang mung kccmalaysia@gmail.com de laika shagun le hpaji mai jaw la ai lam, hpaji jaw la na hpe mung myit mada nga ga ai.

Yawng hpe Karai Wa Shaman chyeju n hpaw n ya jaw ya u ga.

Hkristu hta,

Shd. Paul Kaiji Naw Awng

Ningbaw Malai

KCCM